საქართველოს შინაგან საქმეთა სამინისტრომ დღეს დაადასტურა რუსთავი 2-ის მიერ გავრცელებული ინფორმაცია, რომლის მიხედვითაც, პოლიციელებს გაექცათ მსახიობ დავით როსტომაშვილზე ბრალდებული პირი. როგორც სამართალდამცავი უწყება განმარტავს, ისინი ამ დრომდე გამოძიების ინტერესებიდან გამომდინარე დუმდნენ.

შსს-ს ცნობით, მიმდინარე წლის 14 ივნისს სამართალდამცავებმა დავით როსტომაშვილის დაყაჩაღების ფაქტზე, საქართველოს სსკ-ს 179-ე მუხლით დაიწყეს გამოძიება. პოლიციამ ცხელ კვალზე დააკავა 1992 წელს დაბადებული ბ.კ., რომელიც სამმა უბნის ინსპექტორმა გადაიყვანა თბილისის დროებითი მოთავსების იზოლატორში. იზოლატორში შესახლებამდე, ბადრაგირების დროს, ბ.კ.-მ გაქცევა და მიმალვა შეძლო. მას ბრალი დაუსწრებლად წარედგინა და იგი იძებნება ყაჩაღობის ბრალდებით.

აღნიშნულ ფაქტთან დაკავშირებით თბილისის პროკურატურაში გამოძიება სამსახურებრივი გულგრილობის ფაქტზე დაიწყო. პოლიციის სამივე თანამშრომელს ბრალი უკვე წარედგინა 2017 წლის 23 ივნისს თბილისის საქალაქო სასამართლოს მიერ აღნიშნულ პირებს აღმკვეთი ღონისძიების სახით შეეფარდათ გირაო. სასამართლომ მათ ასევე შეუჩერა უფლებამოსილება.

როგორც შსს აცხადებს, ამავე ყაჩაღობის ფაქტზე, ბრალდებულის სახით, პოლიციამ 1991 წელს დაბადებული ზურაბ ქ. დააკავა, რომელიც დაზარალებულმა დავით როსტომაშვილმა და მისმა ქალიშვილმა, ქეთევან როსტომაშვილმა ამოიცნეს, როგორც ზემოხსენებული დანაშაულის ჩამდენი პირი.