რუსულმა ავიაკომპანიამ საქართველოში ფრენების შესრულებისთვის აუცილებელი ნებართვა დღეს, 15 მაისს მიიღო.

რატომ არის მნიშვნელოვანი: კომპანია, რომელიც საქართველოში 17 მაისიდან კვირაში შვიდჯერ იფრენს, უკრაინამ 2022 წლის მაისში დაასანქცირა.

  • მიზეზი ომი იყო, კერძოდ დოკუმენტში ნათქვამია, რომ კომპანია ოპერირებს რუსეთის მთავრობისთვის სტრატეგიული მნიშვნელობის სექტორებში.
  • უზრუნველყოფს მაღალ მატერიალურ (ტრანსპორტი, ლოჯისტიკა და სხვა) მხარდაჭერას იმ ქმედებებისთვის, რომლებიც ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტსა და დამოუკიდებლობას.

დეტალები: სამოქალაქო ავიაციის სააგენტომ დღეს გაავრცელა ინფორმაცია, რომ ავიაკომპანია Azimuth Airlines ევროკავშირის შავ სიაში არაა.

  • ეკონომიკის მინისტრმა, ლევან დავითაშვილმა თქვა, რომ რუსულ ავიაკომპანიებს საქართველოს სამივე აეროპორტში სურთ ფრენა.
  • როგორც ის ამბობს, რომ საავიაციო სააგენტოს ექსპერტებთან ერთად ინტენსიური მუშაობა ჰქონდათ, შეისწავლეს სხვა ქვეყნების მაგალითები და "მსოფლიოში ყველაზე მკაცრ მიდგომაზე" შეჯერდნენ.