საქართველოს პრეზიდენტის ადმინისტრაცია საზოგადოებრივი მაუწყებლის გენერალურ დირექტორს მიმართავს.

რატომ არის მნიშვნელოვანი: 2023 წლის 9 მაისს ათონელის ქუჩაზე გაიმართა ევროპის დღისადმი მიძღვნილი საზეიმო ღონისძიება, რომელიც გაიხსნა ევროპული საბჭოს პრეზიდენტის შარლ მიშელის ქართველი ხალხისადმი მიმართვით და ევროპის დღის მილოცვით.

  • ადმინისტრაციის განცხადებით, საზეიმო კონცერტის დაწყებამდე მათ სთხოვეს საზოგადოებრივ მაუწყებელს ღონისძიების დასაწყისის (რამდენიმე წუთი) პირდაპირი ეთერით ტრანსლაცია.
  • თუმცა მათივე თქმით, თხოვნის მიუხედავად, ღონისძიების შესახებ რეპორტაჟი საზოგადოებრივ მაუწყებელზე არა პირდაპირ ეთერში (21:00 საათზე), არამედ საინფორმაციო პროგრამა მოამბის ერთ-ერთ ბოლო სიუჟეტში 21:27 საათზე, მათ შორის რეგულაციები პარაპლანით ფრენაზე სიუჟეტის შემდეგ გაკეთდა.

დეტალები: მიმართვაში ნათქვამია, რომ მაუწყებლობის შესახებ საქართველოს კანონის შესაბამისად, საზოგადოებრივი მაუწყებლის ვალდებულებას წარმოადგენს საქართველოს საგარეო პოლიტიკის ძირითადი მიმართულებების, მათ შორის, ევროკავშირში ინტეგრაციის პოპულარიზაცია.

  • მიიჩნევენ, რომ საზოგადოებრივმა მაუწყებელმა არაჯეროვნად შეასრულა ეს ვალდებულება.
  • რადგან არ მიანიჭა სათანადო მნიშვნელობა ევროკავშირიდან საქართველოს და ქართველი ხალხისადმი მხარდამჭერ უმაღლესი დონის განცხადებას.
  • რაც განსაკუთრებული დატვირთვის მქონეა დღეს, როცა საქართველო ევროკავშირის წევრი ქვეყნის კანდიდატის სტატუსის მინიჭებას ელის.