ამის შესახებ მოძალადე, პუტინისტი, პრორუსი ალტ-ინფოს დამფუძნებელი სოციალურ ქსელში წერს.

რატომ არის მნიშვნელოვანი: მორგოშია ღიად პრორუსული ძალის ლიდერია და ის საქართველოში არაერთი ძალადობრივი აქციის ერთ-ერთი ორგანიზატორი იყო.

  • ალტ-ინფოს ღიად აქვს გაცხადებული პრორუსული პოლიტიკა, ეთერიდან ძალადობრივ, ქსენოფობიურ და ანტიდასავლურ ნარატივებს აჟღერებენ და სახიფათო კრემლისტურ პროპაგანდას ავრცელებენ.

დეტალები: მორგოშია წერს, რომ ქართული ოცნება პარტნიორი პარტიების მეშვეობით ყველა იმ კანონს მიიღებს, რომელსაც წლებია ითხოვენ და ამტკიცებს, რომ ამაზე უტყუარი ინფორმაცია აქვს.

  • "ეს ამბავი ძალიან მახარებს, სჯობს გვიან, ვიდრე არასდროს", — წერს ის.
  • გარდა ამისა, 5 ივლისს "ქართველი ხალხის უდიდეს გამარჯვებასა და საქართველოში ლიბერალიზმის დასასრულის დასაწყისს" უწოდებს — ეს მაშინ, როდესაც ამ დღეს დაგეგმილ ღირსების მარშზე პრორუსმა ძალადობრივმა ჯგუფებმა და სასულიერო პირებმა ძალადობა დააორგანიზეს.
  • დაარბიეს აქტივისტების ოფისები, იძალადეს 50-ზე მეტ ჟურნალისტზე — 5 ივლისს ნაცემი ოპერატორი ლექსო ლაშქარავა გარდაიცვალა.

იქამდე, დღეს, 2 მაისს პარლამენტში გამართულ პლენარულ სხდომაზე ევროპელი სოციალისტების ლიდერმა, ფრიდონ ინჯიამ თქვა, რომ უცნობის აქციაზე გაჟღერებულ მოთხოვნებს კანონპროექტად დაარეგისტირებს.

  • უცნობის ორგანიზებული სახელისუფლებო აქცია პრორუსული და ანტიდასავლური შინაარსის იყო, სადაც ანტილიბერალური და ჰომოფობიური გზავნილები ჟღერდებოდა.

  • სცენიდან ისმოდა ქართული ოცნებისა და მათი ლიდერების ქებაც და მმართველი გუნდის პროპაგანდისტული ნარატივები მშვიდობაზე. არც მმართველმა ძალამ დააყოვნა და უცნობს აქცია მოუწონა.

  • ინჯიამ სხდომაზე გაიმეორა ის მოთხოვნები, რომელიც რამდენიმე დღის წინ უცნობის აქციაზე წაიკითხეს.
  • მათ შორისაა, რევოლუციის თავიდან ასაცილებლად, პოლარიზაციისა და კრიზისის შემთხვევაში პლებისციტის ჩატარება, "ლგბტ პროპაგანდის" კანონით აკრძალვა, დემოგრაფიული მდგომარეობის გამოსასწორებლად ქმედითი სახელმწიფო პროგრამის განხორციელება და სუვერენული პოლიტიკის გატარება.