გახმაურებული საი-ფაი სერიალი Black Mirror მაყურებელს მე-6 სეზონით უბრუნდება. ანთოლოგიური სერიალის შემქმნელი ჩარლი ბრუკერი გვამცნობს, რომ "ყველაზე მოულოდნელს უნდა ველოდოთ". დაახლოებითი წარმოდგენის შესაქმნელად კი, უკვე პირველი ტრეილერის ნახვაც შეგვიძლია.

ჯერჯერობით უცნობია, რამდენ ეპიზოდს გააერთიანებს შავი სარკის ახალი სეზონი. დაუზუსტებელია პრემიერის თარიღიც, თუმცა, ტრეილერიდან ვიგებთ, რომ მონატრებულ სერიალს მაყურებელი ნეტფლიქსზე ივნისიდან იხილავს.

ამასთან, გასულ წელს გავრცელებული ინფორმაციიდან ვიცით, რომ მე-6 სეზონში მის წინამორბედზე მეტი სერია იქნება თავმოყრილი. როგორც ცნობილია, თითოეული ეპიზოდი უფრო კინემატოგრაფიული ხასიათის იქნება და მათი ქრონომეტრაჟიც გაიზრდება.

"ყოველთვის მიმაჩნდა, რომ შავმა სარკემ ერთიმეორისგან სრულიად განსხვავებული ამბები უნდა გააერთიანოს და მაყურებელთან ერთად მეც გამაოცოს", — აცხადებს ბრუკერი, — "ეს უნდა იყოს სერიალი, რომელსაც ადვილად ვერ აღწერთ და რომელიც საკუთარ თავს გარდაქმნის".

სწორედ ამიტომ, შოუს შემქმნელის თქმით, მე-6 სეზონში შავი სარკის უკვე ნაცნობ მოტივებთან ერთად, ახალ თემებსაც შევხვდებით — მათ შორის ისეთს, რომელზეც თავად ბრუკერი იფიცებოდა, რომ სერიალი არასდროს შეეხებოდა.

ემის მფლობელი Black Mirror 2011 წლიდან მოყოლებული ერთ-ერთი ყველაზე პოპულარული დისტოპიური სერიალია. მისი ამ დროისთვის ბოლო, მე-5 სეზონი 2019 წელს გამოვიდა და სულ სამი სერია გააერთიანა. მას შემდეგ მსოფლიოში კორონავირუსის პანდემია დაიწყო, ხოლო ჩარლი ბრუკერი ირწმუნებოდა, რეალობა ისედაც მეტისმეტად პირქუშია და მაყურებელი მე-6 სეზონისთვის მზად არ არისო.

შეიძლება დარწმუნებული არც ახლა ხართ, რომ შავი სარკის დაბრუნებისთვის მზად ვართ, მაგრამ ახალი სეზონის სამსახიობო გუნდი ეჭვებს გაგიფანტავთ — სერიალის ამ ნაწილში ისეთ ვარსკვლავებს ვიხილავთ, როგორებიც ბენ ბარნსი, სალმა ჰაიეკი და აარონ პოლი არიან.

ასევე იხილეთ: