შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს თანამშრომლებმა საგამოძიებო მოქმედებების შედეგად სამი პირი დააკავეს.

რა მოხდა: გამოძიების თანახმად, არაფხიზელ მდგომარეობაში მყოფმა პირმა 12 აპრილს, მარნეული-სადახლოს საავტომობილო მონაკვეთზე, ავტომობილით გადაადგილებისას ავარიული სიტუაცია შექმნა, რის შემდეგაც საპატრულო პოლიციის წარმომადგენლებმა მას ავტომობილის გაჩერებისკენ მოუწოდეს.

  • მძღოლი არ დაემორჩილა სამართალდამცავების მოთხოვნას, გზა განაგრძო მარნეულის მუნიციპალიტეტის ერთ-ერთი სოფლის მიმართულებით, თუმცა ვერ უზრუნველყო მოძრაობის უსაფრთხოება, მოცურდა და გადაბრუნდა.
  • შსს-ს ცნობით, მანქანაში მყოფმა პირებმა სამართალდამცველებს სიტყვიერი და ფიზიკური შეურაცხყოფა მიაყენეს და დააზიანეს შინაგან საქმეთა სამინისტროს ბალანსზე არსებული ავტომობილი.
  • პოლიციის განცხადებით, შემთხვევას ადგილობრივები შეესწრნენ, რომლებმაც პოლიციელებს მანქანაში მყოფი პირების დაკავებაში ხელი შეუშალეს და მათ ადგილიდან მიმალვა მოახერხეს.
  • მოგვიანებით, დანაშაულში ბრალდებული მძღოლი და მისი ორი მგზავრი პოლიციამ დააკავა.
  • პოლიციელებზე თავდასხმის ფაქტზე გამოძიება საქართველოს სისხლის სამართლის კოდექსის 353-ე პრიმა მუხლით მიმდინარეობს, რაც 4-დან 7 წლამდე ვადით თავისუფლების აღკვეთას ითვალისწინებს.