საზოგადოებრივი მაუწყებელი TNS-ს ეგზიტპოლის ჩატარებისთვის ფულს გადაუხდის მიუხედავად იმისა, რომ ამის გაკეთებას ამჟამინდელი მენეჯმენტი ჯერ კიდევ რამდენიმე თვის წინ არ აპირებდა. გადაწყვეტილება მაუწყებლის სამეურვეო საბჭომ დღეს, 20 ივნისს, მიიღო. ამ გადაწყვეტილებით მაუწყებელი ვალდებულია 76 339 ევრო გადაიხადოს.

TNS-მა საზოგადოებრივი მაუწყებლისთვის, GDS-სთვის, იმედისთვის და მაესტროსთვის საერთო ეგზიტპოლი 2016 წლის საპარლამენტო არჩევნებისთვის ჩაატარა. ეგზიტპოლის შედეგებით, ქართული ოცნება 53,8 პროცენტს იღებდა, ნაციონალური მოძრაობა - 19,5 პროცენტს, პატრიოტთა ალიანსი კი - 5 პროცენტს. ცესკოს მონაცემები ასეთი იყო: ქართული ოცნება - 48,67 პროცენტი, ნაციონალური მოძრაობა - 27,11 პროცენტი, პატრიოტთა ალიანსი - 5,01 პროცენტი.

სწორედ ეს ცდომილება იყო მიზეზი, რის გამოც მაუწყებელი თანხის გადახდას არ აპირებდა. როგორც არხის გენერალურმა დირექტორმა, ვასილ მაღლაფერიძემ 18 აპრილს თქვა, თანხის არგადახდის შესახებ მან TNS-ს წერილობით აცნობა. ამავე დღეს სამეურვეო საბჭოს თავმჯდომარემ, გრიგოლ გოგელია ეგზიტპოლის ჩამტარებელი კომპანიისგან, ცდომილების გამო, კომპენსაციის მიღებაზეც საუბრობდა.