ამ თემაზე ბრიფინგი ლელოს ერთ-ერთმა ლიდერმა, ბადრი ჯაფარიძემ და ადვოკატმა, ზვიად კორძაძემ გამართა.

რატომ არის მნიშვნელოვანი: ბადრი ჯაფარიძეს, მამუკა ხაზარაძესა და ავთანდილ წერეთელს პროკურატურა ფულის გათეთრებას ედავებოდა.

  • პროკურატურა განმარტავდა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად, სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბადრი ჯაფარიძე ფიგურირებდნენ.
  • 2022 წლის 12 იანვარს ხაზარაძე-ჯაფარიძე-წერეთელს ბრალი გადაუკვალიფიცირეს და ფულის გათეთრების ნაცვლად, დამნაშავედ თაღლითობაში ცნეს.
  • მოსამართლემ მათ 7 წელი მიუსაჯა, თუმცა საქმის ხანდაზმულობის გამო სასჯელი გააუქმეს.
  • 2023 წლის 26 იანვარს სააპელაციომ საქალაქოს გადაწყვეტილება ძალაში დატოვა.
  • საქმე გასაჩივრებულია უზენაეს სასამართლოშიც.

დეტალები: ადვოკატ ზვიად კორძაძის განცხადებით, საკონსტიტუციოში სწორედ კი იმ ნორმებს ასაჩივრებენ, რაც სასამართლომ გამოიყენა — "ხანდაზმულობა, გადაკვალიფიცირების უფლება იმ ფორმით და იმ სახით, რაც სასამართლომ გამოიყენა".

  • ბადრი ჯაფარიძის თქმით, მასა და მამუკა ხაზარაძეზე უკვე 4 წელია პოლიტიკური დევნა ხორციელდება.
  • აცხადებს, რომ ეს დევნა დაკვეთილი იყო ქართული ოცნების დამფუძნებლის მიერ და განხორციელდა პროკურატურის და სასამართლოს მეშვეობით.
  • "დღეისთვის ნათელია, როგორ უმსგავსოდ მიიღება გადაწყვეტილებები იმ კლანის დაკვეთით, რომელიც სანქცირებული იქნა აშშ-ის მიერ. სწორედ ეს კორუმპირებული კლანი იდგა იმ სასამართლო გადაწყვეტილების უკან, რომელიც მიღებულ იქნა ჩვენს წინააღმდეგ";
  • "ჩვენ არ ვაპირებთ გავაჩეროთ ბრძოლა და ვაპირებთ, ყველა სამართლებრივი გზა გამოვიყენოთ მიუხედავად იმისა, რომ საქართველოში სასამართლო არის სრულად დაქვემდებარებული".
  • როგორც ჯაფარიძე, ასევე ადვოკატი განმარტავენ, რომ ყველა ინსტანციის გავლის შემდეგ, საქმეს საერთაშორისო სასამართლოშიც წაიღებენ.