რატომ არის მნიშვნელოვანი: კომუნიკაციების კომისიამ დაადგინა კონკურენციის შესახებ კანონის მე-7 მუხლის დარღვევა, რომელიც კონკურენციის შემზღუდველ ხელშეკრულებას, გადაწყვეტილებას ან შეთანხმებულ ქმედებას, ე.წ. კარტელურ გარიგებას გულისხმობს.

  • მათივე განცხადებით, ეს კარტელური გარიგების პირველი პრეცედენტია მედიასივრცეში.

დეტალები: კომისიის ცნობით, კონკურენტი მაუწყებლები: ტელეიმედი, მთავარი არხი, ტელეკომპანია პირველი, პოსტივი, ფორმულა და მედია ჰოლდინგი გაერთიანდნენ და შუამავალი კომპანიის, მედია რაითს ჯორჯიას მეშვეობით ტრანზიტორ კომპანიებს მაუწყებლობის ტრანზიტისთვის ერთობლივად დადგენილ საფასურს სთხოვდნენ.

  • მაგთიკომი, სილქნეტი, ახალი ქსელები და ცენტრალური კავშირგაბმულობის კორპორაცია მაუწყებლებისთვის პასუხისმგებლობის დაკისრებასა და მათ მიერ დადებული ხელშეკრულების ბათილად ცნობას ითხოვდნენ.
  • მათივე განმარტებით, მაუწყებლების მიერ ტრანზიტის საფასურის ერთობლივი დადგენა ზღუდავს კონკურენციას და ეწინააღმდეგება კანონს.
  • საქმის პრეცედენტულობიდან გამომდინარე, მაუწყებლები სიმბოლური თანხით — 100-100 ლარით დაჯარიმდნენ და კანონსაწინააღმდეგო ხელშეკრულების 1 თვის ვადაში გაუქმების ვალდებულება დაეკისრათ.