კანონპროექტის ინიციატორები ანა ნაცვლიშვილი და არმაზ ახვლედიანი არიან.

რატომ არის მნიშვნელოვანი: ყოველწლიურად პიროტექნიკის გამოყენების შედეგად ათობით ადამიანი შავდება.

  • ქუთაისში, ახალი წლის ღამეს პიროტექნიკის სროლის შედეგად ქალი დაშავდა, მიყენებული დაზიანების შედეგად კი გარდაიცვალა.
  • ასევე, დამწვრობის ცენტრში ყოველწლიურად არაერთი ბავშვი მიჰყავთ სხვადასხვა დაზიანებებით.
  • ბევრი მიზეზი არსებობს იმისთვის, თუ რატომ უნდა ვთქვათ უარი ფეიერვერკის გამოყენებაზე.
  • საქართველოში პიროტექნიკასთან დაკავშირებულ შეზღუდვებს ადმინისტრაციული სამართალდარღვევათა კოდექსი არეგულირებს.
  • ადმინისტრაციული პასუხისმგებლობაა ღამის საათებში პიროტექნიკური ნაკეთობის გამოყენებაზე, სისხლის სამართლის კოდექსის კი ითვალისწინებს პასუხისმგებლობას ფეთქებადი, ადვილად აალებადი, მწვავე ნივთიერების ან პიროტექნიკური ნაკეთობის აღრიცხვის, შენახვის, გადაზიდვის, გამოყენების ან გადაგზავნის წესების დარღვევისათვის.

დეტალები: ანა ნაცვლიშვილი ამბობს, რომ პიროტექნიკის აკრძალვის საკითხზე ბევრი ადამიანი წერდა, განსაკუთრებით, ახალი წლის დღეებში.

  • "პირობა შესრულებულია! დღეს მე და ჩემმა კოლეგა არმაზ ახვლედიანმა საქართველოს პარლამენტში დავაინიცირეთ კანონპოექტი პიროტექნიკის აკრძალვის შესახებ", — წერს ნაცვლიშვილი.
  • დეპუტატი ამბობს, რომ ადამიანები პიროტექნიკას უკონტროლოდ, გართობის მიზნით იყენებენ, რასაც ხშირად შედეგად მათი ან გარშემომყოფების ჯანმრთელობის მდგომარეობის სერიოზული დაზიანება მოსდევს.
  • მისივე თქმით, ზიანდება გარემო, მასობრივად იხოცება და სხვაგვარი ზიანი ადგებათ ფრინველებსა და ცხოველებს. უმნიშვნელოვანესი პრობლემაა პიროტექნიკის გამოყენებით გამოწვეული ხმაურიც.

კანონპროექტი ითვალისწინებს: პიროტექნიკის შემოტანის, ფლობის, რეალიზაციის, გამოყენების აკრძალვას. გარდა F1 კატეგორიის პიროტექნიკისა, რომლის უსაფრთხოების მანძილია 1 მეტრი, ან ნაკლები და მისი გამოყენება შეიძლება დახურულ სივრცეში.

  • ხოლო სხვა კატეგორიის პიროტექნიკის გამოყენება დასაშვები იქნება მხოლოდ მთავრობის განკარგულების საფუძველზე, ერთჯერადად განსაკუთრებულ შემთხვევებში.
  • კანონპროექტის მიღების შემდეგ, პიროტექნიკის უკანონო გამოყენებისათვის ფიზიკური და იურიდიული პირები დაჯარიმდებიან შესაბამისად — 1000 და 5000 ლარით.
  • პიროტექნიკური ნაკეთობის უკანონო შემოტანა, ფლობა, რეალიზაცია ან/და გამოყენება იმ პირის მიერ, რომელიც ბოლო 1 წლის განმავლობაში უკვე იყო ადმინისტრაციულ სახდელდადებული პიროტექნიკის ამკრძალავი რეგულაციების საფუძველზე, ისჯება სისხლის სამართლის წესით.

ანა ნაცვლიშვილი ამბობს, რომ საგანგებო სიტუაციების კოორდინაციისა და გადაუდებელი დახმარების ცენტრის ოფიციალური ინფორმაციით, მარტო 2023 წლის იანვარში ცენტრს დახმარებისთვის მიმართა პიროტექნიკის გამოყენებით დაზარალებულმა 87-მა მოქალაქემ.

  • აქედან 18 წლამდე ასაკის იყო 19 პირი, ჰოსპიტალიზაციის საჭიროება დადგა 41 შემთხვევაში.
  • დეპუტატი გაწეული შრომისთვის განსაკუთრებულ მადლობას უხდის თორნიკე ართქმელაძეს და მარიამ გოგოლაძეს, ასევე პარლამენტის კვლევით ცენტრს.