სავარაუდოდ, მარიუპოლში ხალხთან შეხვედრის ამსახველი ვიდეო კრემლმაც გამოაქვეყნა, თუმცა ის კადრი, სადაც შეძახილი ისმის, რუსულ მედიებსა და ტელეგრამ არხებზე გავრცელდა.

რატომ არის მნიშვნელოვანი: შაბათ-კვირას რუსული პროპაგანდისტული მედიები წერდნენ, რომ ანექსიის გამოცხადების წლისთავზე რუსეთის პრეზიდენტი ოკუპირებულ ყირიმში, შემდე კი მარიუპოლში ჩავიდა.

  • კრემლმა ვიდეო გაავრცელა, სადაც იმის ჩვენება სცადა, თითქოს რუსეთი მარიუპოლს აშენებს და ადგილობრივებს პუტინი უყვართ.
  • თუმცა ერთ-ერთმა პირმა 2 წინადადების წამოძახებით რუსი პროპაგანდისტების შრომა წყალში ჩაყარა.

დეტალები: კრემლის გავრცელებულ ოფიციალურ ვიდეოში ჩანს, რომ, სავარუადოდ, მარიუპოლისკენ მიმავალ მანქანას პუტინი თავად მართავს და თანმხლები პირი ესაუბრება, როგორ "აღადგინეს" ომის შედეგად რუსების მიერვე განადგურებულ ქალაქი.

  • რამდენიმე წუთში მანქანა ახალაშენებული კორპუსის ეზოში ჩერდება — როგორც კრემლის პრესსამსახური წერს, "ნევსკის მიკრორაიონში პუტინი ესაუბრა მარიუპოლის მოსახლეობას".
  • რუსი დიქტატორი საბავშვო სკვერში მოძრაობს, იქვე სპეციალურად მომზადებულ მაგიდაზე მისი თანმხლები ფაილებს დევს და ათვალიერებინებს, რა და როგორ გააკეთეს.
  • ამის შემდეგ კი ქუჩაში "შემთხვევით" მდგომ და "გახარებულ" ხალხთან პუტინი მიდის — ისმენს, როგორ ლოცულობენ მისთვის და როგორი მადლიერი და ბედნიერი არიან.
  • სანამ პუტინის ფანები მას აქებენ, შორიდან ისმის ქალის შეძახილი "ეს ყველაფერი სიმართლე არ არის. ეს მხოლოდ საჩვენებლადაა".
  • ამ დროს პრეზიდენტის თანმხლები პირები თვალებს აცეცებენ და ცდილობენ გაერკვნენ, საიდან მოდის ხმა, ერთ-ერთი მათგანი წასვლასაც აპირებს, თუმცა მას აჩერებენ.
  • ეს ყველაფერი კრემლის ვიდეოში არ არის, რადგან კადრი გაჭრილია და პუტინის ერთ-ერთი მადიდებლის საუბარზე გადადის.
  • შემდეგ კი გვაჩვენებენ, თითქოს მარიუპოლის მაცხოვრებელი პუტინს სახლში იწვევს და ახალგარემონტებულ ბინას ათვალიერებინებს, სადაც "შემთხვევით" მაგიდაზე საჭმელი და ფანჯრის რაფაზე ხილი ჩანს.