და, აი, ისიც — სულ ცოტა ხნის წინ შედგა პრემიერა სიმღერისა, რომლითაც საქართველო 2023 წლის ევროვიზიაზე წარდგება. ირუ ხეჩანოვის Echo წლევანდელი ევროფესტივალის ბოლო სიმღერაა და ამიტომ, გულშემატკივრები საქართველოს საკონკურსო კომპოზიციას განსაკუთრებულად ელოდებოდნენ.

სიმღერის ავტორი გიგა კუხიანიძეა, მისი ტექსტი კი ირუ ხეჩანოვსა და ბენი ქადაგიძეს ეკუთვნით. ვიდეორგოლის რეჟისორი ზაზა ორაშვილი გახლავთ.

22 წლის ირუ ხეჩანოვმა მასშტაბურ მუსიკალურ ფესტივალზე საქართველოს წარმომადგენლის სტატუსი საზოგადოებრივი მაუწყებლის პროექტ ვოისში გამარჯვებით მოიპოვა. აღსანიშნავია, რომ იგი ასევე იყო ჯგუფ ქენდის წევრი, რომელმაც 2011 წელს ჩვენს ქვეყანას საბავშვო ევროვიზიაზე მეორე გამარჯვება მოუტანა.

ევროვიზიის რიგით 67-ე კონკურსი გაერთიანებული სამეფოს ქალაქ ლივერპულში გაიმართება 9 მაისიდან 13 მაისამდე. უკვე ცნობილია, რომ საქართველო ფესტივალის მეორე ნახევარფინალში, 11 მაისს, წარდგება მაყურებლის წინაშე. აღსანიშნავია ისიც, რომ წელს საქართველოს მიმართ განსაკუთრებული ინტერესია — ამაზე მეტყველებს ბუქმეიკერების რეიტინგი, რომლის საუკეთესო ათეულში ირუ ხეჩანოვი ჯერ კიდევ სიმღერის გამოსვლამდე მოხვდა.

2023 წლის ევროვიზიის სლოგანი "მუსიკით გაერთიანებული" იქნება.

ფოტო: BBC / EBU

2023 წლის ევროვიზია, წესით, უკრაინაში უნდა გამართულიყო, რადგან გასულ წელს კონკურსის გამარჯვებული სწორედ უკრაინა გახდა. თუმცა, შექმნილი ვითარებიდან გამომდინარე, ევროფესტივალის ორგანიზატორი გაერთიანებული სამეფოს საზოგადოებრივი მაუწყებელი BBC იქნება. ამის მიუხედავად, პროცესში აქტიურად ჩაერთვება უკრაინული მხარეც, რათა ღონისძიებაზე ქვეყნის მახასიათებელი ელემენტებიც იყოს წარმოდგენილი. ამასთან, უკრაინა, როგორც 2022 წლის ევროვიზიის გამარჯვებული, ეგრეთ წოდებულ დიდ ხუთეულთან ერთად ნახევარფინალური ტურის გარეშე მოხვდება ფინალში.

საქართველომ ევროვიზიაზე თოთხმეტჯერ მიიღო მონაწილეობა, თუმცა, ბოლო წლები ჩვენი ქვეყნისთვის წარუმატებელი აღმოჩნდა. ბოლოს საქართველოს წარმომადგენელმა ნახევარფინალური ტურიდან ფინალში გადასვლა 2016 წელს შეძლო. ჩვენს საუკეთესო შედეგად კვლავ მე-9 ადგილი რჩება, რომელიც 2010 წელს სოფო ნიჟარაძემ, 2011-ში კი ჯგუფმა Eldrine დაიკავეს.