2023 წლის ევროვიზიის სიმღერის კონკურსს გაერთიანებული სამეფო უმასპინძლებს. ღონისძიების ორგანიზატორის — ევროპის მაუწყებელთა კავშირის — გადაწყვეტილება ცნობილი სულ ცოტა ხნის წინ გახდა.

რიგით 67-ე ევროვიზია, ტრადიციულად, მომავალი წლის მაისში გაიმართება. ჯერჯერობით უცნობია, რომელ ბრიტანულ ქალაქში ჩატარდება კონკურსი — მასპინძელი არენის შერჩევის პროცესი მიმდინარე კვირაში დაიწყება.

ცხადია, რომ 2023 წლის ევროვიზიის ორგანიზატორი გაერთიანებული სამეფოს საზოგადოებრივი მაუწყებელი BBC იქნება, თუმცა, პროცესში აქტიურად ჩაერთვება უკრაინული მხარეც, რათა ღონისძიებაზე ქვეყნის მახასიათებელი ელემენტებიც იყოს წარმოდგენილი. ამასთან, უკრაინა, როგორც 2022 წლის ევროვიზიის გამარჯვებული, ეგრეთ წოდებულ დიდ ხუთეულთან ერთად ნახევარფინალური ტურის გარეშე მოხვდება ფინალში.

როგორც ვთქვით, წლევანდელი ევროვიზიის ტრიუმფატორი უკრაინა გახდა. ქვეყნის წარმომადგენელმა ჯგუფმა KALUSH ORCHESTRA-მ, საკონკურსო სიმღერით Stefania, ჯამში 631 დააგროვა და უკრაინას ევროფესტივალზე მესამე გამარჯვება მოუტანა.

• KALUSH ORCHESTRA — 10 საინტერესო ფაქტი ევროვიზიის წლევანდელ გამარჯვებულზე

მოგვიანებით, ცნობილი გახდა, რომ ჯგუფმა კონკურსზე მოგებული პრიზის აუქციონზე გაყიდვა გადაწყვიტა. მიღებული თანხით KALUSH ORCHESTRA-მ უკრაინული სამხედრო ძალების დასახმარებლად დრონები შეიძინა.

მასპინძლობის ჩამორთმეული უფლება

რადგან უკრაინაში რუსეთის დაწყებული ომი ისევ მიმდინარეობს, კონკურსზე ჯგუფის გამარჯვებიდან მალევე გაჩნდა კითხვა, შეძლებდა თუ არა ქვეყანა მომავალი წლის ევროვიზიის მასპინძლობას. რამდენიმე კვირის წინ ევროპის მაუწყებელთა კავშირმა განაცხადა, რომ "არსებული გარემოებების გათვალისწინებით, უსაფრთხოების გარანტიებს მასპინძელი მაუწყებელი ვერ უზრუნველყოფს და ვერ შეძლებს ევროვიზიის სიმღერის კონკურსის ჩატარებას წესების შესაბამისად". ამიტომ, უკრაინას კონკურსის ჩატარების უფლება ჩამოერთვა.

რადგან 2022 წლის ევროვიზიაზე მეორე ადგილი გაერთიანებულმა სამეფომ დაიკავა, სწორედ მას მიეცა შანსი, მომავალი წლის კონკურსისთვის ემასპინძლა. აღსანიშნავია, რომ ბრიტანეთი კონკურსის ერთ-ერთი ყველაზე გამოცდილი ორგანიზატორია: ქვეყანამ ევროვიზიას 8-ჯერ უმასპინძლა, აქედან ოთხ შემთხვევაში — სხვა ქვეყნის მაგივრად. მასშტაბური ღონისძიება გაერთიანებულ სამეფოში ბოლოს 1998 წელს ჩატარდა.

ვიხილავთ საქართველოს 2023 წლის ევროვიზიაზე?

რაც შეეხება საქართველოს, ჯერჯერობით უცნობია, მიიღებს თუ არა ქვეყანა მომავალი წლის ევროვიზიაზე მონაწილეობას. კონკურსის ფინალურ ტურში გადასვლა ვერც წელს შევძელით — ზედიზედ მეხუთედ ჩავრჩით ნახევარფინალში. ამასთან, წელს საქართველოს წარმომადგენელმა ჯგუფმა ცირკუს მირკუსმა კონკურსის მეორე ნახევარფინალში ბოლო ადგილი დაიკავა.

ევროპის ყველაზე დიდ მუსიკალურ შოუში ჩვენმა ქვეყანამ ჯამში 14-ჯერ მიიღო მონაწილეობა. საქართველოს საუკეთესო შედეგად კვლავ მე-9 ადგილი რჩება, რომელიც 2010 წელს სოფო ნიჟარაძემ, 2011-ში კი ჯგუფმა Eldrine დაიკავა.