რატომ არის მნიშვნელოვანი: ჯაფარიძე 7 მარტის მშვიდობიან აქციაზე დააკავეს. 8 ჯაფარიძის ფეისბუქგვერდის ადმინისტრატორი წერდა, რომ პარლამენტის გვერდით შეჰყავდათ რობოკოპები, რა დროსაც ჩხუბი დაიწყო და "თან შეიყოლეს" ჯაფარიძე და პარტიის კიდევ ერთი წევრი, ნიკა მოსიაშვილი.

  • ჯაფარიძის ცოლმა, ნატა ქორიძემ თქვა, რომ აქციაზე ჯაფარიძეს თავში მიაყენეს დაზიანებები, შემდეგ კი შესაბამისი სამედიცინო დახმარება არ გაუწიეს.
  • DRI-ის შეფასებით, ჯაფარიძის მიმართ ევროპული კონვენციის, სულ მცირე, სამი მუხლი დაირღვა.
  • დღეს ელენე ხოშტარიამ გაავრცელა ფოტო, სადაც ჩანს, რომ ჯაფარიძეს თავზე დაზიანებები აღენიშნება.

დეტალები: ჯაფარიძე ამბობს, რომ ისინი არა დაკავებულები, არამედ გატაცებული და ნაცემი იყვნენ და მათ ანგარიში გაუსწორეს.

  • "ამის შემდეგ ჩვენ დაახლოებით ერთი საათი დავყავით იმ ეზოში, უბრალოდ ჩუმად ვიდექით, იმიტომ რომ ლაპარაკზე გვცემდნენ და ველოდებოდით როგორ გეგმავდნენ რუსთაველის გაწმენდის ოპერაციას ჩვენ თვალწინ".
  • "შემდეგ მოვიდნენ კრიმპოლის თანამშრომლები, რომლებიც ამ დაკავებსთან არაფერ შუაში არ არიან. იქცეოდნენ უაღრესად წესიერად, პროფესიონალურად. გადაგვიყვანეს ე.წ სამმართველოში, სადაც შეავსეს ოქმი, გააფორმეს რაღაცა, ვითომ დაკავებაა. ამის შემდეგ ვიყავი წინასწარი დაპატიმრების იზოლატორში ორი ღამე და მერე მოგვიყვანეს აქ".
  • "ის, რომ ბოლოში ეს ყველაფერი დასრულდა ოქმის დასრულებით, არ ნიშნავს, რომ ჩვენ დაგვაკავეს, ჩვენ გაგვიტაცეს და გვცემეს, უბრალოდ მერე აქეთ დაგვაბრალეს სამართალდარღვევა".

ჯაფარიძის თქმით, მოსამართლე აშკარად ანგაჟირებულია და მას პროცესის გადადება არ სურდა, მიუხედავად იმისა, რომ მოსიაშვილს მაღალი წნევა ჰქონდა.

  • "მათ შორის, სასამართლოს ექიმმა დაადასტურა, რომ მოსიაშვილს ჰქონდა ძალიან მაღალი წნევა, აწუხებდა თავის ძალიან ძლიერი ტკივილი, მიუხედავად ამისა, დაალევინა წამლები და დაელოდა, ამის შემდეგ ვნახეთ, რომ წნევამ არ დაუწია, მაინც გააგრძელა პროცესი.
  • ჯაფარიძე აღნიშნავს, რომ სასწრაფოს დადასტურება გახდა საჭირო, რომ მათ გამოკვლევებზე სჭირდებოდათ გადაყვანა, მიუხედავად ამისა, მოსამართლემ პროცესი მხოლოდ რამდენიმე საათი გადადო.