თბილისის საქალაქო სასამართლომ კომპანია სვეტის მფლობელის, გივი ჯიბლაძის გატაცებაში ბრალდებულებს პატიმრობა შეეფარდა. ინფორმაციას ამის შესახებ საზოგადოებრივი მაუწყებელი ავრცელებს.

პატიმრობის აღკვეთის ღონისძიების სახით შეფარდებით, მოსამართლემ ბრალდების მხარის პოზიცია გაითვალისწინა. დაცვის მხარე კი, გირაოს შეფარდებას ითხოვდა. საზოგადოებრივი მაუწყებლის ინფორმაციით, აღკვეთის ღონისძიების განჩინების გასაჩივრება იგეგმება.

ბრალდებულების, ლევან ჩქარეულისა და კახა ბახტაძის ადვოკატი, იოსებ ხარატიშვილი აცხადებს, რომ გატაცებაში დადანაშაულებით ბიზნეს-ვალდებულებებისთვის თავის არიდებას ცდილობს.

"როგორც ჩემი დაცვის ქვეშ მყოფები აღნიშნავენ იყო მხოლოდ და მხოლოდ ბიზნეს საქმიანობა, ამ ბიზნეს საქმიანობიდან გამომდინარე გარკვეული ვალდებულება ჰქონდა შესასრულებელი, მათ შორის ფინანსური, რასთან დაკავშირებითაც ხდებოდა აღნიშნული შეხვედრები. ამ ეტაპისთვის ვფიქრობთ, რომ არის პროვოცირებული გარკვეული მიზნების მისაღწევად," - განუცხადა ადვოკატმა რუსთავი 2-ს.

ჯიბლაძის გატაცების ბრალდებით ოთხი პირი 12 ივნისს თბილისში, აღმაშენებლის ხეივანში, მოსამართლის განჩინების საფუძველზე, ცენტრალურმა კრიმინალურმა პოლიციამ დააკავა. შემთხვევის შედეგად ამ ტერიტორიაზე გარკვეული პერიოდით შეფერხებული იყო საავტომობილო მოძრაობა.

შინაგან საქმეთა სამინისტროს ცნობით, გამოძიება სსკ-ის 143-ე და 181-ე მუხლებით მიმდინარეობს, რაც თავისუფლების უკანონო აღკვეთასა და გამოძალვას გულისხმობს.