აქციაზე სიტუაცია მას შემდეგ დაიძაბა, რაც პარლამენტმა რუსული კანონი პირველი მოსმენით მიიღო.

რატომ არის მნიშვნელოვანი: საკანონმდებლო ორგანოსთან შეკრებილები რუსულ კანონს აპროტესტებენ, რომელსაც მხარი 76-მა დეპუტატმა დაუჭირა, 13 კი მის წინააღმდეგ წავიდა.

  • მოქალაქეები, პოლიტიკოსები, სხვადასხვა სფეროს წარმომადგენლები პარლამენტთან დილიდან, ბიუროს სხდომის პარალელურად, შეიკრიბნენ, თუმცა როდესაც ადგილის დატოვება დაიწყეს, უმრავლესობამ რუსული კანონის განხილვა, 9 მარტის ნაცვლად, დღესვე გადაწყვიტა.
  • მაშინვე დაიგეგმა მეორე აქცია, რომელიც ახლაც გრძელდება — გადაკეტილია რუსთაველის გამზირი.

დეტალები: აქციაზე შეკრებილი მშვიდობიანი მოქალაქეების წინააღმდეგ წიწაკის სპრეი გამოიყენეს.

  • სპეციალური დანიშნულების რაზმებმა მოქალაქეებს გზა გადაუკეტეს.
  • პარლამენტთან გამოჩნდნენ წყლის ჭავლის მანქანებიც. სამართალდამცავები მოქალაქეებს აფრთხილებენ, რომ მათ მიმართ გამოყენებული იქნება "კანონით გათვალისწინებული ძალა".

განახლება: შსს-ს მტკიცებით, პარლამენტის შენობის მიმდებარე ტერიტორიაზე მიმდინარე საპროტესტო აქციამ ძალადობრივი ხასიათი მიიღო და აქციის მონაწილეების მხრიდან პარლამენტის ერთ-ერთი შესასვლელის ბლოკირების მცდელობა იყო.

  • უწყება აცხადებს, რომ სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი.
  • "იმ შემთხვევაში, თუ შეკრებილები არ დაემორჩილებიან პოლიციელთა კანონიერ მოთხოვნას და სამართალდამცველებს გაუწევენ წინააღმდეგობას, პოლიცია გამოიყენებს კანონით გათვალისწინებული პროპორციულ ძალას, მათ შორის, სპეციალურ საშუალებებს", — ნათქვამია განცხადებაში.