ქართული ოცნდების დეპუტატი ამბობს, რომ მას წერილი ყოფილმა სტუდენტმა გაუგზავნა.

სტუდენტებმა ყოფილ ლექტორს, საგარეო ურთიერთობა კომიტეტის თავმჯდომარეს წერილი მისწრეს და მოუწოდეს, არ დაუჭიროს მხარი რუსულ კანონს.

• ისინი მიიჩნევენ, რომ "უცხოური გავლენის აგენტებზე" კანონპროექტი საქართველოს კონსტიტუციას, ეროვნულ ინტერესებს ეწინააღმდეგება და ქვეყნის ევროპულ და ევროატლანტიკურ მისწრაფებებს ძირს უთხრის.
• "ის პირდაპირ ეწინააღმდეგება დემოკრატიისა და თავისუფლების იდეალებს, სწორედ იმ ღირებულებებს, რომლებზეც არაერთხელ გვისაუბრია თქვენს ლექციებზე. ამ ყოველივეს გათვალისწინებით, იმედს ვიტოვებთ, რომ საჯაროდ გამოთქვამთ კანონპროექტისადმი უარყოფით პოზიციას და შეძლებთ თქვენი კოლეგების დარწმუნებას კანონპროექტის მიზანშეუწონლობაში", — ნათქვამი იყო წერილში.
• ასევე, მიმართავდნენ სამხარაძეს, შეხვდნენ მისთვის მისაღებ საჯარო ფორმატში, გაუზიარონ მოსაზრებები და მოისმინონ არგუმენტები.

დეტალები: სამხარაძის თქმით, სტუდენტებს შეხვედრა შესთავაზა და ამბობს, რომ მათთან ისაუბრებს ყველაფერზე, რაც აინტერესებს.

• "რა თქმა უნდა, ვისაუბრებთ, რას ეფუძნება ეს შიშები, ჩვენ რა პოზიცია გვაქვს. როგორ ვუყურებთ ამ კანონპროექტის სამომავლო ბედს. ასევე, რას იტყვის ვენეციის კომისია და ა.შ".
• ამბობს იმასაც, რომ მეორე მოსმენა მხოლოდ და მხოლოდ მუხლობრივ განხილვას გულისხმობს, თუმცა ის არ გაიმართება მანამ, სანამ, ვენეციის კომისიისგან რეკომენდაციას არ მიიღებენ.
• თანაგუნდელების მსგავსად, ისიც გამჭვირვალობის საჭიროებაზე აპელირებს და ამტკიცებს, რომ კანონი "ვერანაირად ვერ იქნება წინააღმდეგობაში დემოკრატიასთან".
• "თუ მათ კონკრეტულ ტერმინებზე აქვთ აქვთ წუხილი, კიდევ ერთხელ ვამბობ, ამ ტერმინებს და წუხილებს მეორე მოსმენის დროს დეტალურად განვიხილავთ მათთან ერთად, სხვათა შორის, მათ ჩართულობითაც", — ამბობს სამხარაძე.

რატომ არის მნიშვნელოვანი: ქართული ოცნებიდან წამოსული დეპუტატებით დაკომპლექტებულმა ანტიდასავლურმა მოძრაობამ, ხალხის ძალამ კანონპროექტი შეიმუშავა, რომლის მიზანიც მედიისა და არასამთავრობო ორგანიზაციების დისკრედიტაციაა.

• მათ სურთ, შეიქმნას "უცხოური გავლენის აგენტების რეესტრი", სადაც დარეგისტრირდება ყველა არასამეწარმეო იურიდიული პირი და მედიასაშუალება, რომელთა შემოსავლების 20%-ზე მეტი უცხოეთიდან ფინანსდება.
• მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი კრემლმა მედიების, ორგანიზაციებისა და თავისუფალი სიტყვის წინააღმდეგ გამოიყენა.
• გასულ წელს ადამიანის უფლებათა ევროპულმა სასამართლომ დაადგინა,რომ ეს რუსული კანონი ადამიანის უფლებებს არღვევს.

"უცხოური გავლენის აგენტებზე" კანონპროექტი გააკრიტიკა არაერთმა ექსპერტმა, ადგილობრივმა და საერთაშორისო ორგანიზაციამ.

• ევროსაბჭოს საპარლამენტო ასამბლეა ეჭვქვეშ აყენებს ხალხის ძალის მიერ წარდგენილი პროექტის თავსებადობას დემოკრატიულ და ადამიანის უფლებათა სტანდარტებთან.
• ომბუდსმენის აპარატშიც ამბობენ, რომ კანონპროექტი არ შეესაბამება ადამიანის უფლებათა საერთაშორისო და შინა ეროვნული დაცვის სტანდარტებს და თანამედროვე დემოკრატიული სახელმწიფოს ძირითად პრინციპებთან შეუთავსებელია.
• ხალხის ძალაში ცდილობენ დაამტკიცონ, თითქოს მათი პროექტი არა რუსული, არამედ უნგრული და ამერიკული კანონიდანაა აღებული, თუმცა ასე არ არის.
• სენატორმა ჯინ შაჰინმა განაცხადა, რომ ის არ არის აშშ-ში არსებული კანონის მსგავსი, რაც შეეხება უნგრულ კანონს OSCE/ODIHR, ევროპის საბჭოს ადამიანის უფლებათა კომისარმა, ვენეციის კომისიამ და გაერომ ის უარყოფითად შეაფასა.
• ამ განმარტებების, მოწოდებებისა და მიმართვების ფონზე, კანონპროექტზე გამიჯვნის ნაცვლად, მმართველ გუნდში აცხადებენ, რომ მას მხარს დაუჭერენ.