საკანონმდებლო ორგანოსადმი შესაბამის მიმართვას ნიდერლანდების ჰელსინკის კომისია (NHC) აქვეყნებს.

რატომ არის მნიშვნელოვანი: ანტიდასავლურმა მოძრაობამ, ხალხის ძალამ "უცხოური გავლენის აგენტებზე" კანონპროექტი შეიმუშავა.

  • მოძრაობაში სურთ, შეიქმნას "უცხოური გავლენის აგენტების რეესტრი", სადაც დარეგისტრირდება ყველა არასამეწარმეო იურიდიული პირი და მედიასაშუალება, რომელთა შემოსავლების 20 პროცენტზე მეტი უცხოეთიდან ფინანსდება.
  • მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი თავისუფალი სიტყვის წინააღმდეგ გამოიყენა.
  • გასულ წელს ადამიანის უფლებათა ევროპულმა სასამართლომ დაადგინა, რომ "უცხოური აგენტების" შესახებ კანონი ადამიანის უფლებებს არღვევს.
  • მმართველი გუნდიდან ამ ინიციატივას არავინ გამიჯვნია. პირიქით, ითქვა, რომ "გამჭვირვალობის პრობლემა" ნამდვილად არსებობს.

დეტალები: საერთაშორისო ორგანიზაციების ერთობლივ განცხადებაში ნათქვამია, რომ კანონპროექტი იმეორებს ავტორიტარული სახელმწიფოების პრაქტიკას, რომელიც ძირს უთხრის შეკრებისა და გამოხატვის თავისუფლებას და სერიოზული საფრთხეა დემოკრატიისა და სამოქალაქო საზოგადოებისთვის.

  • "ადამიანის უფლებათა ზოგიერთ სფეროში გარკვეული პროგრესის მიუხედავად, საქართველოს ინსტიტუციური დამოუკიდებლობა მკვეთრად უარესდება. ამჟამინდელი ხელისუფლების მიერ ძალაუფლების კონცენტრირებისკენ სწრაფვამ გამოიწვია დემოკრატიის შემცირება.
  • მოვუწოდებთ საქართველოს პარლამენტის წევრებს, არ მიიღონ შემოთავაზებული კანონმდებლობა "უცხოური აგენტების" შესახებ, რადგან ეს კიდევ უფრო შეიყვანს ქვეყანას რუსეთის პოლიტიკური გავლენის ორბიტაში და დააშორებს ქართველი ხალხის ევროპულ მისწრაფებებს", — ვკითხულობთ განცხადებაში.