აფგან მუხტარლის ადვოკატი არჩილ ჩოფიკაშვილი საქართველოდან გატაცებული აზერბაიჯანელი ჟურნალისტისთვის დაზარალებულის სტატუსის მინიჭებას ითხოვს.

"პირველივე დღეს იყო საკმარისი საფუძვლები, იმისთვის, რომ მას დაზარალებულის სტატუსი მიენიჭებინათ აფგან მუხტარლისთვის, პროკურატურის გარდა ყველა თანხმდება იმაზე, რომ მუხტარლი ამ გატაცებისას დაზარალდა" - აცხადებს ის რუსთავი 2-თან საუბრისას.

ჩოფიკაშვილის თქმით, პროკურატურას ჯერ მის არცერთ მოთხოვნაზე უპასუხია და საქმეში არსებული მასალების გაცნობის საშუალება მხოლოდ დღეს მიეცა. ადვოკატი აცხადებს, რომ საქმის მასალების მიხედვით, დაკითხული მოწმეების უმრავლესობა ამბობს, რომ არაფერი იცის.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

რამდენიმე დღის წინ, აზერბაიჯანის პარლამენტის წევრმა განაცხადა, რომ აფგან მუხტარლის გატაცება საქართველო-აზერბაიჯანის ერთობლივი და წარმატებული სპეცოპერაციის შედეგია. აღნიშნულს გამოეხმაურა საქართველოს უსაფრთხოების სამსახური და განცხადებაში უარყო რაიმე სახის მონაწილეობას აფგან მუხტარლის დაკავების საქმეში.