ცნობილი ბრიტანელი მწერლის, იენ ფლემინგის, ჯაშუშური რომანების სერიას ჯეიმს ბონდზე სულ მალე 70 წელი შეუსრულდება. ამ განსაკუთრებული თარიღის აღსანიშნავად, სერიის საავტორო უფლებების მფლობელები წიგნების ხელახლა გამოცემას გეგმავენ.

თუმცა, როგორც გავიგეთ, ფლემინგის ორიგინალური ტექსტი ახალ გამოცემაში დარედაქტირებული იქნება — ამოღებული იქნება რასისტული მონაკვეთები. ამასთან, გამოცემას წამძღვარებული ექნება გაფრთხილება: "ეს წიგნი დაიწერა მაშინ, როცა დღევანდელი მკითხველისთვის შეურაცხმყოფელი წესები და შეხედულებები იყო გავრცელებული. ამდენად, წინამდებარე გამოცემაში რამდენიმე შესწორება შევიდა, თუმცა, ვეცადეთ, მაქსიმალური სიახლოვე შეგვენარჩუნებინა ორიგინალურ ტექსტთან და მასში ასახულ დროსთან".

როგორც ცნობილია, წიგნში ფლემინგი შავკანიან ადამიანებს მოიხსენიებს დამამცირებელი ტერმინით, რომელიც ახალ გამოცემაში, უბრალოდ, "შავკანიანით" ჩანაცვლდა. ამასთან, ამოღებულ იქნა მონაკვეთები, რომლებიც რასისტულ სტერეოტიპებს შეიცავს. მაგალითისთვის, ერთგან ბონდი ოქროსა და ალმასის ვაჭრობაში ჩართულ აფრიკელებს ახასიათებს "კანონმორჩილ ტიპებად, მხოლოდ იმ გამონაკლისით, როცა მეტისმეტად ილეშებიან ხოლმე". შესწორებულ გამოცემაში ამ წინადადების მეორე ნაწილი მოჭრილია.

სერიის სხვადასხვა წიგნიდან ამოიღეს ეროვნებების დასახელებებიც. ზოგიერთ შემთხვევაში კი, წინადადებები შეიკვეცა ან უზუსტო პერიფრაზის საშუალებით გადმოიცა.

აღსანიშნავია, რომ თავისი ერთ-ერთი წიგნის შესწორებული ვარიანტი თავად იენ ფლემინგმაც დაადასტურა, სანამ 1964 წელს გარდაიცვლებოდა. გამომცემლების თქმით, ამჟამინდელი შესწორებებიც მის მიდგომას ეფუძნება.

"ხალხს ვურჩევთ, წიგნები აპრილში გამოცემის შემდეგ თავადვე წაიკითხონ და შეაფასონ", — აცხადებენ გამომცემლები.

აღსანიშნავია, რომ სენსიტიური მონაკვეთები და შეურაცხმყოფელი ტერმინები ცოტა ხნის წინ ამოიღეს როალდ დალის წიგნებიდანაც. თუმცა, მას შემდეგ, რაც შესწორებული ტექსტის გამოცემა ბევრმა გააკრიტიკა (მათ შორის, სალმან რუშდიმ), გადაწყდა, რომ ორგვარი ვერსია დაიბეჭდება — ორიგინალური და დარედაქტირებული.