ინფორმაცია ამის შესახებ დღეს გავრცელდა. შესაბამისი განკარგულება გამოქვეყნდა მთავრობის სხდომაზე, რომელსაც არაღიარებული რესპუბლიკის პრეზიდენტი, არაიიკ ჰარუტიუნიანი ხელმძღვანელობდა.

რატომ არის მნიშვნელოვანი: ლაჩინის დერეფანი, რომელიც მთიანი ყარაბაღისთვის ერთადერთი დამაკავშირებელი გზაა სომხეთსა და დანარჩენ მსოფლიოსთან, მესამე თვეა ბლოკირებულია. რეგიონში ჰუმანიტარული კრიზისია.

  • აზერბაიჯანის პრეზიდენტმა განაცხადა, რომ საერთაშორისო პარტნიორებთან შეთანხმდა, განიხილონ "ყარაბაღში სომხური უმცირესობის უფლებები და გარანტიები", მათ შორის, ლაჩინის ბლოკადის საკითხი.
  • თუმცა, ალიევი უარს აცხადებდა რუბენ ვარდანიანთან მოლაპარაკებაზე, რადგან "ბაქოს არ სურს მოლაპარაკება იმ პირთან, რომელიც რუსეთიდანაა ექსპორტირებული, რათა წამყვანი პოზიცია ჰქონდეს ყარაბაღში".
  • საკადრო ცვლილების შემდეგ, მთიან ყარაბაღს არაღიარებული რესპუბლიკის გენერალური პროკურორი, გურგენ ნერსისიანი უხელმძღვანელებს.

დეტალები: მილიარდერი ვარდანიანი სახელმწიფო მინისტრის პოსტს 3,5 თვე იკავებდა და ზედამხედველობას უწევდა მთიანი ყარაბაღის ყველა სამინისტროს — გარდა თავდაცვის და შინაგან საქმეების სამინისტროებისა.

  • რუსი-სომეხი ბიზნესმენი და მილიარდერი სახელმწიფო მინისტრის პოსტის დასაკავებლად რუსეთის მოქალაქეობას გამოეთხოვა და სექტემბერში მთიან ყარაბაღში გადავიდა.
  • ჰარუტიუნიანმა ყოფილ სახელმწიფო მინისტრს გაწეული სამსახურისთვის მადლობა გადაუხადა და დასძინა:
  • "მთელი ამ დროის განმავლობაში მე და რუბენ ვარდანიანი ერთად ვიყავით, ყოველდღიურად ვაკვირდებოდით მოვლენებს, რომლებიც მიმდინარეობდა როგორც არცახში, ასევე გარე სამყაროში, მუდმივად ვცვლიდით იდეებს არსებული სიტუაციიდან გამოსავლის შესახებ".
  • ჰარუტუნიანმა განმარტა, რომ საკადრო ცვლილების მიზეზი გახდა მას და ვარდანიანს შორის შიდა და გარე საკითხებისადმი არსებული სტრატეგიული განსხვავებები.