ქართული ოცნების თავმჯდომარემ რუსთავი 2-ის ეთერში თქვა, რომ ხალხის ძალის ინიციატივის შემდეგ არ ჰქონიათ უმრავლესობის შეკრება, ამიტომ გუნდის პოზიციას ვერ დააფიქსირებს. "შევიკრიბებით, მათ შორის საპარლამენტო უმრავლესობის ფორმატში და ასე მივიღებთ გადაწყვეტილებას", — თქვა მან.

რატომ არის მნიშვნელოვანი: ანტიდასავლურმა მოძრაობამ, ხალხის ძალამ "უცხოური გავლენის აგენტებზე" კანონპროექტი დააინიცირა.

  • კანონით, "უცხოური გავლენის გამჭვირვალობის უზრუნველყოფის მიზნით", შეიქმნება "უცხოური გავლენის აგენტების" რეესტრი, სადაც დარეგისტრირდება ყველა ის არასამეწარმეო იურიდიული პირი და მედიასაშუალება, რომელთა შემოსავლების 20 პროცენტზე მეტი ფინანსდება უცხოური ძალების მიერ.
  • მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი თავისუფალი სიტყვის წინააღმდეგ გამოიყენა.

კობახიძის განცხადებით, როგორც იურისტი პროექტს გაეცნო და აღნიშნა, რომ გამჭვირვალობაში ვერავითარ პრობლემას ვერ ხედავს.

  • "გამჭვირვალე თუ გახდება კონკრეტული NGO-ს თუ სხვა ორგანიზაციის ფინანსები, ეს სასჯელია?! პარტიები დასჯილები არიან ახლა, რომ ახდენენ თავიანთი ფინანსების დეკლარირებას?!" — ასე ცდილობს წარმოაჩინოს კანონპროექტის შინაარსი.
  • მან პარლამენტის თავმჯდომარის მსგავსად პარტიისა და სამოქალაქო სექტორის გავლენები საზოგადოებაზე ერთ კონტექსტში ისაუბრა.
  • "პარტიებს აქვთ სერიოზული გავლენა საზოგადოებაზე, პოლიტიკურ ცხოვრებაზე და საზოგადოებამ უნდა იცოდეს, მათ შორის, დაფინანსების კუთხით, ვინ დგას კონკრეტული პარტიის უკან. NGO-ებზეც იგივე შეიძლება ითქვას, ხომ?"
  • "ჰკითხეთ ნებისმიერ მოქალაქეს და ვერავინ გეტყვით რეალურად ვინ აფინანსებს ამა თუ იმ მედიასაშუალებას. აქ მარტო ტელემაუწყებლებზე არ არის საუბარი, აქ საუბარია სხვა მაუწყებლებზე, საუბარია ვებგამოცემებზე, ონალინ და ბეჭვდით მედიაზე, ყველაფერზეა საუბარი".

გარდა ამისა, კობახიძემაც ისაუბრა თავად ტერმინ "აგენტებზე" და პაპუაშვილის მსგავსად მანაც ხაზი გაუსვა, რომ ეს სხვა ტერმინია და ჯაშუში სხვა.

  • "ჯაშუშობა არის დასჯადი, ჯაშუშობაა არის სხვა რამე და ვიღაცის და რაღაცის აგენტი რომ ხარ, ეს არის სხვა რამე";
  • "აგენტი ნიშნავს იმას, რომ ვიღაცის ინტერესის გამტარებელი ხარ და არა ჯაშუში. შეიძლება სხვა ტერმინიც არსებობდეს, მაგრამ რეალურად, ამ ტერმინს ვერ გამოეკიდებით. იმიტომ, რომ აგენტი არსებობს";
  • კობახიძემ კანონპროექტში ჩაწერილ "აგენტზე" საუბრისას, ახსენა დაზღვევის აგენტი — "სააგენტო ჰქვია საჯარო რეესტრის ეროვნულ სააგენტოს და ეს არ ნიშნავს, რომ აგენტებზე მუშაობს. ეს მიღებული ტერმინია რეალურად და ნიშნავს ინტერესების გამტარს" — ასე გიქრობს კობახიძ.