თბილისის მუნიციპალიტეტის მიერ დაფუძნებული კომპანია შპს სინათლის ქალაქის ძველის თბილისის განყოფილების უფროსმა, ზაზა მუშკუდიანმა On.ge-სთან საუბარში განმარტა, თუ რატომ არ ჩაირთო დროულად გარე განათება რუსთაველის გამზირზე, სადაც Birja Mafia-ს მხარდამჭერი მასშტაბური საპროტესტო აქცია მიმდინარეობს:

"გარე განათება ირთვება პროგრამულად. რადგან დღეს ცუდი ამინდის გამო შედარებით ადრე დაბნელდა, ამიტომ მოგვიწია ხელით ჩართვა, რადგან ვერ დაველოდებოდით პროგრამულ ჩართვას. 800-ზე მეტი ჩამრთველი კარადა გვაქვს და ეტაპობრივად ვრთავთ".

აქციის მონაწილეები მიიჩნევდნენ, რომ მერიამ გარე განათების არჩართვის გადაწყვეტილება სპეციალურად მიიღო. მათ პროტესტის ნიშნად ტელეფონებით გაანათეს ტერიტორია.

აქცია რუსთაველის გამზირზე რეპერების დუეტის, Birja Mafia-ს წევრების, გიორგი ქებურიასა და მიშკა მგალობლიშვილს მხარდასაჭერად იმართება. თბილისის საქალაქო სასამართლომ მათ 9 ივნისს წინასწარი პატიმრობა შეუფარდა. მუსიკოსებს სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში, დაკავებულებს 8-დან 20 წლამდე ან უვადო თავისუფლების აღკვეთა ემუქრებათ.