პინკ ფლოიდის ვარსკვლავმა, 79 წლის როჯერ უოტერსმა მიიღო რუსეთის მიწვევა და გაეროს უშიშროების საბჭოში სიტყვით გამოვიდა.

რატომ არის მნიშვნელოვანი: შეხვედრას, რომელიც უკრაინაში ვითარების განსახილველად ოთხშაბათს გაიმართა, 15 ერის წარმომადგენელი ესწრებოდა, როტერსი კი რუსულ პროპაგანდისტულ გზავნილებს აჟღერებდა.

• პინკ ფლოიდის თანადამფუძნებელის პოლიტიკური შეხედულებები და რუსეთის მხარდამჭერი განცხადებები ხშირად ხდება განკითხვის საგანი, რადგან მისი მუსიკა წლების განმავლობაში დიქტატურის წინააღმდეგ და თავისუფლებისთვის ბრძოლის სიმბოლო იყო.
• კონტრასტი განსაკუთრებით შესამჩნევია იმის ფონზე, რომ პინკ ფლოიდის წევრი, დევიდ გილმორი უკრაინის ღია მხარდამჭერია.

დეტალები: რუსეთის დელეგაციის მიერ მიწვეული უოტერსი ამტკიცებდა, რომ წარმოადგენს "დაახლოებით 4 მილიარდ ძმებსა და დებს" — კაცობრიობის უმრავლესობას.

• უოტერსმა გაეროს უშიშროების საბჭოს მიმართა და ცეცხლის დაუყოვნებლივ შეწყვეტისკენ მოუწოდა, თან უკრაინაში შეჭრაში რუსეთი და დასავლეთი დაადანაშაულა.

• "რუსეთის ფედერაციის მიერ უკრაინაში შეჭრა უკანონო იყო. მე ამას უმკაცრესად ვგმობ", — თქვა მან, მაგრამ იქვე კრემლის ნარატივიც გაავრცელა.

• "თუმცა, ამასთანავე, რუსეთის უკრაინაში შეჭრა არ იყო არაპროვოცირებული, ამიტომ, მე ასევე უმკაცრესად ვგმობ პროვოკატორებს", — დასძინა მან.

• ეს ფრაზა საყურადღებოა, რადგან ომზე საუბრისას პროვოცირებას მხოლოდ კრემლი ახსენებს, თავისუფალი მსოფლიოს სხვა ლიდერები კი მუდმივად იმეორებენ, რომ რუსეთის აგრესია არაპროვოცირებული და გაუმართლებელია.

რუსეთის ელჩმა გაეროში, ვასილი ნებენზიამ უარყო უოტერსის ცნობა შეჭრის უკანონობაზე.

• თუმცა, ნებენზიამ უოტერსს "მოვლენების ძალიან ზუსტი ანალიზისთვის" კომპლიმენტი უთხრა და "თანამედროვე ომის საწინააღმდეგო მოძრაობის ერთ-ერთი ყველაზე გამორჩეული აქტივისტი" უწოდა.

უკრაინის ელჩმა, სერგი კისლიცამ თავის განცხადებაში აღნიშნა, რომ პინკ ფლოიდი საბჭოთა კავშირში 1979 წელს აიკრძალა ავღანეთში შეჭრის წინააღმდეგ პროტესტის გამო.

• "ირონიულია, თუ არა ფარისევლობა, რომ ბატონი უოტერსი ახლა ცდილობს გაათეთროს მორიგი შემოჭრა", — თქვა უკრაინელმა დიპლომატმა.
• "რა სამწუხაროა მისი ყოფილი თაყვანისმცემლებისთვის, როდესაც ხედავენ, რომ ის ირგებს კიდევ ერთი აგურის როლს რუსული დეზინფორმაციისა და პროპაგანდის კედელზე", — დაამატა მან და შემსრულებელს თავისი ცნობილი კომპოზიცია შეახსენა.
• "განაგრძეთ გიტარაზე დაკვრა, მისტერ უოტერს, ეს უფრო გეხერხებათ, ვიდრე ლექციების წაკითხვა, თუ როგორ უნდა შეასრულოს უშიშროების საბჭომ თავისი საქმე", — დასძინა მან.

უოტერსის სხვა სადაო განცხადებები: 2022 წლის 8 აგვისტოს მუსიკოსმა აშშ-ის პრეზიდენტს, ჯო ბაიდენს ომის კრიმინალი უწოდა და ბრალი დასდო უკრაინაში ომის ხელის შეწყობასა და გაძლიერებაში.

• გაეროში გამოსვლამდე, მან ინტერვიუ მისცა Berliner Zeitung-ს, სადაც რუსეთის პრეზიდენტზე ისაუბრა და შეაქო კიდეც — განაცხადა, რომ დიქტატორული მმართველობის მქონე პუტინი "ფრთხილი მმართველია, რომელიც გადაწყვეტილებებს რუსეთის ფედერაციის მთავრობაში კონსენსუსის საფუძველზე იღებს".
• ამ წლის 4 თებერვალს მიცემულ ინტერვიუში კი თქვა, რომ დასავლეთი და უკრაინა პასუხისმგებელნი არიან რუსეთის უკრაინაში შეჭრაზე.
• როჯერ უოტერსი პოლონეთმა პერსონა ნონ გრატად გამოაცხადა უკრაინის ომის შესახებ მისი საკამათო შეხედულებების გამო.