საკონსტიტუციო სასამართლოს ვებგვერდზე გამოქვეყნებული განჩინების მიხედვით, 2023 წლის 11 იანვარს სასამართლოში დარეგისტრირდა მთავრობის განცხადება სასარჩელო მოთხოვნაზე უარის თქმის შესახებ, რაც საქმის შეწყვეტის საფუძველი გახდა.

რატომ არის მნიშვნელოვანი: დავის საგანი იყო საქართველოს დიპლომატიური წარმომადგენლობის ხელმძღვანელის დანიშვნის საკითხთან დაკავშირებით პრეზიდენტის უმოქმედობის კონსტიტუციურობა.

  • შესაბამისად, მთავრობა ითხოვდა განმარტებას ინსტიტუციებს შორის უფლებამოსილების გამიჯვნის თაობაზე.
  • ქართული ოცნებაში ამბობდნენ, რომ გასული ერთი წლის განმავლობაში, იყო არაერთი შემთხვევა, როდესაც პრეზიდენტმა მთავრობის მიერ წარდგენილი ელჩის თუ დიპლომატიური წარმომადგენლის დანიშვნაზე უარი განაცხადა.

დეტალები: საკონსტიტუციოს ვებგვერდზე გამოქვეყნებული განჩინებაში არ არის განმარტებული, რატომ მიიღო მთავრობამ ეს გადაწყვეტილება.

  • On.ge მიზეზის დასადგენად მთავრობის ადმინისტრაციას დაუკავშირდა, პასუხს მიღებისთანავე შემოგთავაზებთ.

კონტექსტი: სარჩელის წარდგენას წინ უძღოდა პრეზიდენტის კრიტიკა მთავრობისა და პარტია ქართული ოცნების მისამართით.

  • პასუხად, პარტიის სპიკერებმა, რომლებიც ზურაბიშვილის საარჩევნო კამპანიაში იყვნენ ჩართულები, მისი კრიტიკა დაიწყეს.
  • მათი მტკიცებით, პრეზიდენტი "თვითნებურად" იქცევა, საგარეო პოლიტიკის წარმოებაში ერევა და კონსტიტუცია რამდენჯერმე დაარღვია.