ამერიკაში რუსულ-ქართული კრიმინალური დაჯგუფების წევრები მძიმე ბრალდებებით დააკავეს. დაკავებულებს შორის ქართველი მოკრივეები, ავთანდილ ხურციძე და ლევან მაყაშვილი, არიან.

ავთანდილ ხურციძის სახელით შექმნილი ფეისბუკ გვერდზე სპორტსმენის განმარტება ვრცელდება:

"მეგობრებო, როგორც იცით, გუშინ გავემგზავრე ამერიკაში, რათა დამეწყო მომზადება 8 ივლისის ბრძოლისთვის. ნიუ-იორკში ჩასვლისთანავე მოხდა ძალიან სერიოზული გაუგებრობა. იმედი მაქვს უახლოეს საათებში ყველაფერი გაირკვევა და ისევ მომეცემა საშუალება განვაგრძო მომზადება სანდერსთან ბრძოლისათვის. მადლობა, რომ ყოველ წამს ვგრძნობ თქვენს მხარდაჭერას!"

ლევან მაყაშვილის ოჯახი პირველი არხთან ასევე ადასტურებს სპორტსმენის დაკავებას.

სპორტის სამინისტროსა და საქართველოს კრივის ეროვნული ფედერაციაში სპორტსმენების დაკავებაზე ინფორმაცია არ აქვთ. ამერიკაში საქართველოს საელჩოსთან დაკავშირება კი ჯერჯერობით ვერ მოხერხდა.

რეკეტი, გამოძალვა, თაღლითობა, დაქირავებული ქილერობა, კონტრაბანდა, იარაღის უკანონო შენახვა-ტარება და ძარცვა - ეს არის იმ ბრალდებების არასრული სია, რაც ნიუ-იორკის პროკურატურამ კრიმინალური დაჯგუფების წევრებს წაუყენა. ამერიკელი სამართალდამცავები ამ დაჯგუფებას რუსულ-ქართულ კრიმინალურ სინდიკატად მოიხსენიებენ, დაკავებულთა უმრავლესობა კი ნიუ-იორკში, ბრუკლინში ცხოვრობდა.

ამერიკის იუსტიციის სამინისტროს საიტზე წერია, რომ ავთანდილ ხურციძის მეტსახელი კიკბოქსერია.