ოფიციალური გადაწყვეტილება ქვეყნის მარეგულირებელმა კომისიამ 22 დეკემბერს გამოაქვეყნა. ინფორმაცია არხის მთავარმა რედაქტორმა, ტიხონ ძიადკომ ტელეგრამის არხ Plushev-თან ინტერვიუშიც დაადასტურა.

რატომ არის მნიშვნელოვანი: უკრაინის წინააღმდეგ ომის დაწყებიდან რამდენიმე დღეში რუსეთმა დამოუკიდებელი კრიტიკული ტელეარხი დოჟდი "უცხო ქვეყნის აგენტად" გამოაცხადა და დაბლოკა.

  • ტელევიზიას პროკურატურამ ვებგვერდი იმის გამო დაუბლოკა, რომ ომს ომი უწოდა და არა სამხედრო ოპერაცია, როგორც ამას პუტინის პროპაგანდა ფუთავს.
  • ტელეკომპანია რუსეთში 2010 წლიდან მუშაობდა.

დეტალები: ივნისში ცნობილი გახდა, რომ ტელეკომპანიამ რუსეთი დატოვა და ლატვიაში მაუწყებლობის ლიცენზია მიიღო. ერთ თვეში არხმა მუშაობაც განაახლა.

  • 6 დეკემბერს ცნობილი გახდა, რომ ლატვიამ ტელეკომპანია დოჟდს მაუწყებლობის ლიცენზია გაუუქმა.
  • მოგვიანებით, ლატვიის ხელისუფლებას მედიასაშუალების მიმართ რამდენიმე პრეტენზია გაუჩნდა.
  • ქვეყნის მარეგულირებელმა დოჟდი 10 000 ევროთი დააჯარიმა რუკისთვის, რომელშიც ტელევიზიამ ოკუპირებული ყირიმი რუსეთის შემადგენლობაში მონიშნა, რუსეთის არმიას კი "ჩვენი" უწოდა.

ასევე, ლატვიის სახელმწიფო უსაფრთხოების სამსახურმა გამოძიება დაიწყო ტელეკომპანიის ეთერში გაკეთებულ განცხადებებზე, რომლებიც აჩენდა ეჭვს, რომ დოჟდი დახმარებას რუსეთის საოკუპაციო ძალების სამხედროებს უწევდა.

  • პირველ დეკემბერს მედიასაშუალების პირდაპირ ეთერში ჟურნალისტმა მაყურებლებს მოუწოდა, მობილიზაციის დროს არსებულ დარღვევებზე მათთვის ეცნობებინათ, რადგან ტელეარხს შეეძლო, აღჭურვილობით დახმარებოდნენ ფრონტზე მყოფ რუს ჯარისკაცებს.
  • მოგვიანებით მედიასაშუალებამ განმარტა, რომ გადაცემის ფრაგმენტი წამყვანის სიტყვებით რუსი სამხედროებისთვის "დახმარებაზე" წაშალეს, ჟურნალისტთან კი თანამშრომლობა შეწყვიტეს.