ამის შესახებ ლატვიის ელექტრონული მედიის ეროვნული საბჭოს თავმჯდომარემ, ივარს აბოლინსმა განაცხადა.

რატომ არის მნიშვნელოვანი: უკრაინის წინააღმდეგ ომის დაწყებიდან რამდენიმე დღეში რუსეთმა დამოუკიდებელი ტელეარხი დოჟდი "უცხო ქვეყნის აგენტად" გამოაცხადა და დაბლოკა;

  • ივნისში ცნობილი გახდა, რომ ტელეკომპანიამ რუსეთი დატოვა და ლატვიაში მაუწყებლობის ლიცენზია მიიღო. ერთ თვეში არხმა მუშაობაც განაახლა.

მოგვიანებით, ლატვიის ხელისუფლებას მედიასაშუალების მიმართ რამდენიმე პრეტენზია გაუჩნდა;

  • ქვეყნის მარეგულირებელმა დოჟდი 10 000 ევროთი დააჯარიმა რუკისთვის, რომელშიც ტელევიზიამ ოკუპირებული ყირიმი რუსეთის შემადგენლობაში მონიშნა, რუსეთის არმიას კი "ჩვენი" უწოდა.
  • ასევე, ლატვიის სახელმწიფო უსაფრთხოების სამსახურმა გამოძიება დაიწყო ტელეკომპანიის ეთერში გაკეთებულ განცხადებებზე, რომლებიც აჩენდა ეჭვს, რომ დოჟდი დახმარებას რუსეთის საოკუპაციო ძალების სამხედროებს უწევდა.
  • პირველ დეკემბერს მედიასაშუალების პირდაპირ ეთერში ჟურნალისტმა მაყურებლებს მოუწოდა, მობილიზაციის დროს არსებულ დარღვევებზე მათთვის ეცნობებინათ, რადგან ტელეარხს შეეძლო, აღჭურვილობით დახმარებოდნენ ფრონტზე მყოფ რუს ჯარისკაცებს.
  • მოგვიანებით მედიასაშუალებამ განმარტა, რომ გადაცემის ფრაგმენტი წამყვანის სიტყვებით რუსი სამხედროებისთვის "დახმარებაზე" წაშალეს, ჟურნალისტთან კი თანამშრომლობა შეწყვიტეს.

დეტალები: ლატვიის ელექტრონული მედიის ეროვნული საბჭოს თავმჯდომარის თქმით, ლიცენზიის გაუქმების გადაწყვეტილება მიღებულია "სახელმწიფო უსაფრთხოებისა და საზოგადოებრივი წესრიგის ინტერესებიდან გამომდინარე".

  • ეროვნული საბჭო დოჟდის დაბლოკვას YouTube-დანაც ითხოვს, რათა არხის შინაარსი ქვეყანაში საერთოდ აღარ იყოს ხელმისაწვდომი.

დოჟდის აღმასრულებელი დირექტორი, ნატალია სინდეევა მედუზასთან ინტერვიუში ამბობს, რომ ლატვიისგან ეს გადაწყვეტილება მოულოდნელი იყო:

  • "არ ვიყავი ამისთვის მზად. დარწმუნებული ვიყავი, რომ ისინი [ლატვიის ხელისუფლება] ამას არ გააკეთებდნენ".