გადაცემა არჩევანში, საქართველოდან გატაცებული აზერბაიჯანელი ჟურნალისტის, აფგან მუხტარლის, საქმეზე საუბრისას, საპარლამენტო უმრავლესობის ლიდერმა არჩილ თალაკვაძემ განაცხადა, რომ საქართველოში ჩამოსული აზერბაიჯანელი დევნილები უპრობლემოდ ცხოვრობენ და გადაადგილდებიან.

თალაკვაძის განცხადებას გამოეხმაურა დარბაზში მყოფი ლიბერალის რედაქტორი ლიკა ზაკაშვილი და სთხოვა მათი ვინაობა დაეზუსტებინა, რაზეც თალაკვაძემ მიუგო, რომ ამ წყაროებს "გაუგზავნიდა".

"უხერხულია ამ განცხადების გაკეთება აქ, იმიტომ რომ აქ გვესწრება ლეილა მუსტაფაევა, რომელსაც ერთი წლის წინ, საქართველოს ხელისუფლებამ უარი უთხრა ბინადრობის უფლებაზე" - განაცხადა ლიკა ზაკაშვილმა.

მან დასძინა, რომ 2016 წლის სექტემბერში საქართველო დატოვა მეიდან TV-ის ჟურნალისტმა, რადგან მას და მის ოჯახს ასევე არ მისცეს საქართველოში ბინადრობის უფლება:

"თავის დროზე სამოქალაქო აქტივისტებმა სათანადო ყურადღება არ მივაქციეთ იმ ყველაფერს, რაც ხდებოდა აზერბაიჯანელი აქტივისტებისა და ჟურნალისტების გარშემო და დღეს ჩვენ სამწუხაროდ ამ რეალობის წინაშე დავდექით".

ზაკაშვილი მიიჩნევს, რომ დღევანდელი პროტესტისა და მუხტარლისადმი სოლიდარობის მიზანი ისაა, რომ სამომავლოდ მსგავსი შემთხვევები აღარ განმეორდეს.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა.

საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს.