ახალგაზრდა შვედი გარემოსდამცველი აქტივისტი გრეტა თუნბერგი არაერთხელ გამხდარა კიბერბულინგისა და ცინიზმის სამიზნე. თუნბერგს მიაჩნია, რომ კლიმატის კრიზისის სიმწვავეზე ხაზგასასმელად ზოგჯერ ხალხის განრისხებაც საჭიროა; თუმცა, თავად აქტივისტი კრიტიკას თუ ვირტუალურ თავდასხმებს ყოველთვის მშვიდად, ზოგჯერ კი ირონიითაც პასუხობს.

ამჯერად, თუნბერგს ცინიკურად მიმართა სექსისტური და მიზოგინური კომენტარებით ცნობილმა ენდრიუ ტეიტმა. ყოფილი კიკბოქსიორი, რომელიც საკუთარ თავს "წარმატების ინსტრუქტორად" მოიხსენიებს, თავისი განცხადებების გამო აქამდე არაერთ სოციალურ ქსელში დაუბლოკავთ. ტეიტმა ტვიტერზე თავის ერთ-ერთ მანქანასთან გადაღებული ფოტო გამოაქვეყნა და პოსტში გრეტაც მონიშნა.

"სალამი, გრეტა", — წერს ტეიტი და აღნიშნავს, რომ 33 მანქანა ჰყავს, — "ეს მხოლოდ დასაწყისია. გთხოვ, მეილის მისამართი მომწერე, რომ ჩემი მანქანების კოლექციის სრული სია გამოგიგზავნო და ისიც მოვაყოლო, თითოეული რამხელა გამონაბოლქვს გამოყოფს".

ამ პოსტს მალევე გამოეხმაურა თუნბერგი და ტეიტს "თავისი მეილის მისამართი" გაუზიარა.

"დიახ, თუ შეიძლება, განმანათლეთ", — წერს გრეტა პოსტში, — "მომწერეთ აქ: [email protected]".

რასაკვირველია, ეს ყალბი მეილის მისამართია, რომლის საშუალებითაც აქტივისტმა ტეიტს სათქმელი ირიბად უთხრა. Small Dick Energy ("პატარა ასოს ენერგია") ამერიკულ სლენგზე აღნიშნავს კაცს, რომელიც ტოქსიკურ მასკულინობას და თავმომწონეობას ავლენს, Get a life კი სასაუბრო ინგლისურში მოწოდებაა, ადამიანმა თავის საქმეს მიხედოს.

ტეიტი, რომელიც თავისი შეხედულებებით განსაკუთრებით პოპულარული ულტრამემარჯვენე ჯგუფებშია, წლევანდელ წელს ყველაზე ხშირად დაგუგლულ ადამიანებს შორის აღმოჩნდა.

სხვადასხვა დროსა და ვითარებაში ტეიტს ქალები კერძო საკუთრებისთვის შეუდარებია, ასევე გრაფიკულად აღუწერია, როგორ იძალადებდა ქალზე, ეს უკანასკნელი თუ ღალატში დაადანაშაულებდა. 2017 წელს დიდი გამოხმაურება მოჰყვა ასევე მის განცხადებას, რომ სექსუალური ძალადობის მსხვერპლ ქალებსაც ეკისრებათ მომხდარზე პასუხისმგებლობა.

რაც უნდა ირონიული იყოს, ინსტაგრამზე, ფეისბუქზე, ტიკტოკსა და იუთუბზე დაბლოკილმა ტეიტმა განაცხადა, რომ თავის აუდიტორიას ყოველთვის მოუწოდებს, "ტოქსიკურ კაცებს" მოერიდონ. ტეიტს აქტივობის უფლება რამდენჯერმე შეუჩერდა ტვიტერზეც.

რაც შეეხება თუნბერგს, მის პასუხს ინტერნეტში აღფრთოვანებით შეხვდნენ. გრეტას ტვიტს ამჟამად 2,5 მილიონზე მეტი მოწონება აქვს.