სახელმწიფო უსაფრთხოების სამსახურის თანამშრომლებმა დიდი ოდენობით თაღლითობის მცდელობის ბრალდებით საქართველოს ერთი მოქალაქე დააკავეს. ინფორმაციას უწყების პრესსამსახური ავრცელებს.

გამოძიების ინფორმაციით, დაკავებული თბილისის მერიის არქიტექტურის სამსახურის თანამშრომლად ასაღებდა თავს და საქართველოს მოქალაქეს დაჰპირდა სოფელ კრწანისთან მდებარე 4 000 მ2 მიწის ნაკვეთის დაკანონებაში დახმარებას, რის სანაცვლოდაც 20 ათასი ამერიკული დოლარის გადახდა მოსთხოვა.

"ამასთან განუმარტა, რომ მიწის დასაკანონებლად მას აღნიშნული თანხის ნაწილი უნდა გადაეცა სხვადასხვა სახელმწიფო დაწესებულებებში მომუშავე კომპეტენტური თანამდებობის პირებისათვის," - აღნიშნავენ სუს-ში.

მათივე ინფორმაციით, დაკავებულმა მოქალაქეს თაღლითურად გამოართვა მოთხოვნილი თანხის ნაწილი - 10 ათასი დოლარი, რა დროსაც იგი სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა ბრალდებულის სახით დააკავეს. სუს-ში ამბობენ, რომ თანხა ამოღებულია ნივთმტკიცებად.

საქმეზე გამოძიება დიდი ოდენობით თაღლითობის მცდელობის მუხლით მიმდინარეობს. ბრალად დამტკიცების შემთხვევაში გათვალისწინებულია თავისუფლების აღკვეთა ექვსიდან ცხრა წლამდე.