ინფორმაციას საქართველოს დემოკრატიული ინიციატივა (GDI) ავრცელებს.

რატომ არის მნიშვნელოვანი: გიორგი ქებურია ე.წ. ბირჟა მაფიის საქმეზე 2017 წლის 7 ივნისს დააკავეს.

  • პროკურატურა მას ნარკოტიკული დანაშაულის ჩადენას ედავებოდა, რის გამოც ქებურიამ წინასწარ პატიმრობაში 4 დღე გაატარა, გამამტყუნებელი განაჩენის შემთხვევაში კი უვადო პატიმრობა ემუქრებოდა.
  • "ბირჟა მაფიის" რეპერების დაკავებას წინ უძღოდა ვიდეოკლიპის, "TSL შავი ზედა" გამოქვეყნება, სადაც პოლიციელი იყო გაშარჟებული.
  • მათ დაკავებას მასშტაბური საპროტესტო აქცია მოჰყვა, რის შემდეგაც რეპერები პატიმრობიდან გირაოს სანაცვლოდ გაათავისუფლეს.
  • ქებურიას წინააღმდეგ სამართლებრივი დევნა 2017 წლის 15 დეკემბერს თავად სამართალდამცავი უწყების ინიციატივით, დანაშაულის ნიშნების არარსებობის გამო შეწყდა.

დეტალები: GDI-ის ცნობით, ქებურია გენერალური პროკურატურისგან მორალური და მატერიალური ზიანის ანაზღაურებას ითხოვდა, რაც დაკმაყოფილდა.

  • უზენაესმა სასამართლომ ძალაში დატოვა წინა ინსტანციის გადაწყვეტილება და პროკურატურას უკანონო დაკავების, უკანონო პატიმრობისა და სისხლისსამართლებრივი დევნის გამო მორალური და მატერიალური ზიანის ანაზღაურების სახით 24 140 ლარის გადახდა დააკისრა.