ტელეწამყვან ლევან როსტოშვილსა და მსახიობ ლაშა კურტანიძეს სასამართლომ სასჯელის ვადა შეუმცირა.

დღეს, 5 ივნისს, სააპელაციო სასამართლოში გაიმართა განხილვა, სადაც დაკავებულებთან საპროცესო შეთანხმება გაფორმდა.

დღევანდელი სხდომის შედეგად, ლევან როსტოშვილს შვიდი წელი შეუფარდეს, აქედან სამი წელი თავისუფლების აღკვეთა, ოთხი წელი კი პირობითი სასჯელი. ლაშა კურტანიძეს ოთხი წელი შეუფარდეს, აქედან ერთი წელი თავისუფლების აღკვეთა და სამი წელი პირობითი სასჯელი. მათვე დაეკისრათ 40 ათასი ლარი ჯარიმის გადახდა.

საქალაქო სასამართლომ, 23 მარტს ლევან როსტოშვილს რვა წლით, ხოლო მსახიობ ლაშა კურტანიძეს ხუთი წლით თავისუფლების აღკვეთა მიუსაჯა.

ლევან როსტოშვილი და ლაშა კურტანიძე ნარკოდანაშაულის ჩადენის ბრალდებით, თბილისში 2016 წლის 2 მაისს დააკავეს. საქმეზე გამოძიება სისხლის სამართლის კოდექსის 260-ე მუხლის მე-6 ნაწილის ა ქვეპუნქტით და 260-ე მუხლის მე-3 ნაწილის ა ქვეპუნქტით მიმდინარეობს, რაც ნარკოტიკული საშუალების, მისი ანალოგის ან პრეკურსორის უკანონო დამზადებას, წარმოებას, შეძენას, შენახვას, გადაზიდვას, გადაგზავნას ან გასაღებას გულისხმობს.