საქართველოს ეროვნულმა ბანკმა, საქართველოს კანონის მოთხოვნათა დარღვევის გამო, თბილისში არსებულ 28 ვალუტის გადამცვლელ პუნქტს რეგისტრაცია გაუუქმა. ამის შესახებ ინფორმაციას თავად უწყება ავრცელებს.

მათი ინფორმაციით, ვალუტის გადამცვლელ პუნქტებში იდენტიფიკაცია-ვერიფიკაციის პროცესები დარღვევებით მიმდინარეობდა და შიდა კონტროლის სისტემაარ არსებობდა. როგორც უწყებაში ამბობენ, ვალუტის გადამცვლელ ამავე პუნქტების საქმიანობა ხშირად ხდებოდა მომხმარებელთა უკმაყოფილების მიზეზი.

"მართალია, საქართველოში მოქმედი კანონმდებლობა არ კრძალავს ვალუტის გადამცვლელი პუნქტების მიერ ნაღდი ფულით ვალუტის გადაცვლის ოპერაციის განხორციელებისათვის საკომისიო გადასახადის დაწესებას და საყურადღებო კურსით ტრანზაქციების განხორციელებას, თუმცა ასეთ შემთხვევებში, "ვალუტის გადამცვლელი პუნქტების რეგისტრაციისა და რეგულირების წესის" თანახმად, პუნქტი ვალდებულია, აღნიშნულთან დაკავშირებით სათანადო ინფორმაცია მიაწოდოს მომხმარებელს," - აღნიშნავენ ეროვნულ ბანკში.

უწყებაში აღნიშნავენ, რომ ეროვნული ბანკი პერიოდული ინსპექტირებით მომხმარებლის უფლებებს დაიცავს.