როგორც ევროკავშირი აცხადებს, მე-9 პაკეტი რუსეთის მიერ უკრაინის წინააღმდეგ აგრესიული ომის გაგრძელების, მშვიდობიანი მოსახლეობისა და სამოქალაქო ინფრასტრუქტურის წინააღმდეგ მიმდინარე ესკალაციის სიმძიმის საპასუხოდ მიიღეს.

რატომ არის მნიშვნელოვანი: სანქციების სიაში მოხვდნენ დამატებით 200-მდე სუბიექტი.

  • სანქცირებულთა შორისაა, რუსეთის შეიარაღებულ ძალების წარმომადგენლები, ასევე ცალკეული ოფიცრებისა და თავდაცვის კომპანიები, სახელმწიფო სათათბიროსა და ფედერაციის საბჭოს წევრები და სხვა.
  • გადაწყვიტეს ექსპორტის ახალი კონტროლი და შეზღუდვები ორმაგი გამოყენებისა და მოწინავე ტექნოლოგიებზე, რომლებიც ხელს უწყობენ რუსეთის სამხედრო შესაძლებლობებს და ტექნოლოგიურ განვითარებას.

დეტალები: ევროკავშირი ყინავს აქტივებს კიდევ ორი რუსული ბანკის მიმართ. ასევე დაამატებს რუსეთის რეგიონული განვითარების ბანკს რუსეთის სახელმწიფო საკუთრებაში არსებული ან კონტროლირებადი სუბიექტების სიაში, რომლებიც ექვემდებარება ტრანზაქციის სრულ აკრძალვას.

  • აიკრძალა დამატებით ოთხ მედიასაშუალება — NTV/NTV Mir.; Rossiya 1; REN TV და Pervyi Kanal;
  • სანქციების მე-9 პაკეტის მიხედვით, აკრძალულია რუსეთის ფედერაციისთვის ევროკავშირის რეკლამის, ბაზრის კვლევისა და საზოგადოებრივი აზრის გამოკითხვის სერვისების, ასევე პროდუქტების ტესტირებისა და ტექნიკური ინსპექტირების სერვისების მიწოდება;
  • ევროკავშირის მოქალაქეებს ეკრძალებათ ნებისმიერი თანამდებობის დაკავება რუსეთის სახელმწიფო საკუთრებაში არსებული ან კონტროლირებადი იურიდიული პირის, სუბიექტისა თუ უწყების მმართველ ორგანოებში, რომლებიც მდებარეობს რუსეთში.

შეფასებები: საგარეო საქმეთა და უსაფრთხოების პოლიტიკის უმაღლესი წარმომადგენელი, ჯოზეფ ბორელი ამბობს, რომ საკვებისა და შიმშილის შემდეგ, პუტინი ახლა იარაღად აქცევს ზამთარს.

  • "მილიონობით უკრაინელს მიზანმიმართულად ართმევს წყალს, ელექტროენერგიასა და გათბობას. ევროკავშირი პასუხობს ამ უკანასკნელ ესკალაციას და ომის დანაშაულს ჩვენი მძიმე სანქციების მე-9 პაკეტით", — თქვა ბორელმა.
  • მანამდე კი ლიეტუვის საგარეო საქმეთა მინისტრმა გაბრიელიუს ლანდსბერგისმა ტვიტერზე დაწერა, რომ სანქციების მეცხრე პაკეტი ხელიდან გაშვებული შესაძლებლობა იყო.
  • "პოლონეთთან ერთად, ჩვენ შევძელით უსაფრთხოების დამატებითი გარანტიების მიღწევა, რაც ხარვეზებს ხურავს. ლიეტუვა არჩევანს კარიბჭის ჩაკეტვის სასარგებლოდ გააკეთებს", — წერს ის.