განათლების მინისტრისა და ვიცე-პრემიერის, ალექსანდრე ჯეჯელავას თქმით, არავინ უშვებს იმას, რომ შესაძლებელია, აფგან მუხტარლი ა პუნქტიდან წასულიყო და ჩასულიყო ბ პუნქტში. მისივე მტკიცებით, თუ იგი უკანონოდ აპირებდა საზღვრის გადაკვეთას, ამას აუცილებლად პასპორტის გარეშე გააკეთებდა.

ალექსანდრე ჯეჯელავა ასევე ოპოზიციას ადანაშაულებს იმაში, რომ ისინი ქვეყნის ინტერესების საწინააღმდეგოდ ამწვავებენ თემას და უსაფუძვლო ბრალდებებს აჟღერებენ:

"როდესაც საქმე ეროვნული უსაფრთხოების საკითხებს ეხება, ოპოზიცია, რომელიც ქვეყნის ინტერესების საწინააღმდეგოდ ცდილობს ამ თემის გამწვავებას და უსაფუძვლო ბრალდებებით შემოდის, მთავარი სინანული ჩემთვის არის ეს, რომ ფაქტად არის მიღებული დაშვება - ეს ადამიანი გაუჩინარდა თბილისის ცენტრში".

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.