თბილისის სახელმწიფო უნივერსიტეტი ემიჯნება იმ განცხადებებს, რაც უნივერსიტეტში ჩატარებული ანტიდასავლური დისკუსიის დროს გაკეთდა. ამის შესეხებ, უნივერსიტეტის პრორექტორმა, მიხეილ ჩხენკელმა განაცხადა:

"მინდა ხაზგასმით აღვნიშნო, რომ თბილისის სახელმწიფო უნივერსიტეტი კატეგორიულად ემიჯნება იმ აბსურდულ განცხადებებს რაც ე.წ. სამეცნიერო შეკრებაზე გაკეთდა. ჩვენი უნივერსიტეტი იყო, არის და იქნება ევროპული ღირებულებების ერთგული".

მიხეილ ჩხენკელის განმარტებით, უნივერსიტეტის ყოფილმა თანამშრომელმა შეცდომაში შეიყვანა ფაკულტეტის ადმინისტრაცია და აუდიტორია მოითხოვა სამეცნიერო შეკრებისთვის, თუმცა, მოგვიანებით თემატიკა შეცვალა და მოატყუა უნივერსიტეტი:

"ჩვენი უნივერსიტეტის არცერთი სტუდენტი, პროფესორი და თანამშრომელი ამ შეხვედრას არ ესწრებოდა".

30 მაისს უნივერსიტეტში გამართულ შეხვედრაზე, ე.წ "დასავლური საფრთხეების" შესახებ იყო საუბარი, რომელშიც თავდაცვის სამინისტროს ყოფილი თანამშრომელი, ტრისტან წითელაშვილი მონაწილეობდა.

გუშინ, 2 ივნისს, სააგენტო პატრიოტმა გაავრცელა შეხვედრის ამსახველი ვიდეო. ანტიდასავლური დისკუსიის დროს, წითელაშვილმა, რომელიც გასულ წელს, თავდაცვის სამინისტროს დაქვემდებარებაში არსებულ ობიექტებზე უნებართვოდ შესაძლო შესვლის საკითხზე, თავად გაეხვა სკანდალში, აშშ-ის ელჩი, იან კელი საქართველოს შიდა საქმეებში ჩარევაში დაადანაშაულა.