ეკონომიკის მინისტრმა, ლევან დავითაშვილმა ამ საკითხზე მთავრობის სხდომის დასრულების შემდეგ ისაუბრა.

რატომ არის მნიშვნელოვანი: რუსეთის საგარეოში ამბობენ, რომ თუ "წინაპირობები იქნება", გამორიცხული არაა, საქართველოსთან ფრენები აღდგეს.

  • თუ რა "აუცილებელ წინაპირობებს" გულისხმობს, საგარეო უწყების დსთ-ის ქვეყნების მეოთხე დეპარტამენტის დირექტორს არ დაუკონკრეტებია, თუმცა თქვა, რომ თბილისში ამის შესახებ ცნობილია, ხოლო რუსეთში საკითხზე გადაწყვეტილების მიღებას არ გამორიცხავენ.

დეტალები: დავითაშვილის თქმით, საქართველოს მთავრობას რუსეთთან პირდაპირი ფრენების აღდგენასთან დაკავშირებით, ოფიციალური მომართვა ამ ეტაპზე არ აქვს.

  • მისვე განცხადებით, სხვადასხვა საერთაშორისო საავიაციო ორგანიზაციების მხრიდან, რუსულ ავიაკომპანიებთან მიმართებაში, გარკვეული შეზღუდვები არსებობს.
  • "იცით, რომ ამ თემასთან დაკავშირებით ბევრი ტექნიკური საკითხი, სირთულე და გამოწვევა არსებობს და ეს ცალმხრივად გადასაწყვეტი საკითხი არ არის... ამიტომ, ეს საკითხი ასე მარტივად, დღეს ვერ გადაწყდება" - ამბობს დავითაშვილი.

არქივიდან: პუტინის განკარგულებით, რუსულ ავიაკომპანიებს 2019 წლის 8 ივლისიდან საქართველოში პირდაპირი საჰაერო რეისების განხორციელება ეკრძალებათ.

  • ამავე დღეს ძალაში შევიდა რუსეთის ტრანსპორტის სამინისტროს გადაწყვეტილება, ქართული ავიაკომპანიების რუსეთში ფრენების შეჩერებაზეც.
  • ოკუპანტი ქვეყანა მაშინ ამტკიცებდა, რომ ეს დროებითი ნაბიჯი იყო და მისი მთავარი მიზანი საქართველოში "სიტუაციის სტაბილიზაცია, რუსოფობიის კამპანიის შეწყვეტა და რუსეთის მოქალაქეებისთვის საფრთხეების გაქრობა" იყო.