ამის შესახებ ინფორმაცია პროკურატურამ გაავრცელა.

რატომ არის მნიშვნელოვანი: უწყების ინფორმაციით, 24 ივნისს, ყვარელთან მდებარე ტყეში ძალადობისთვის პირობით მსჯავრდადებულმა პირმა და არასრულწლოვანმა სიტყვიერი შეურაცხყოფა მიაყენეს და სცემეს 68 წლის დაზარალებულს, შემდეგ კი თანხა გასტაცეს.

  • ასევე, ბრალდებულები დაზარალებულს პატივისა და ღირსების დამცირების მიზნით კონკრეტულ ქმედებებს აიძულებდნენ, რაც მობილური ტელეფონით გადაიღეს და ვიდეოს გავრცელების მუქარით, დაზარალებულს რამდენიმე დღის ვადაში თანხის გადაცემა მოსთხოვეს.

დეტალები: პროკურატურის ინფორმაციით, სასამართლომ ბრალდებულები დამნაშავედ ცნო ჯგუფურად ჩადენილი ჯანმრთელობის განზრახ ნაკლებად მძიმე დაზიანების, დამამცირებელი და არაადამიანური მოპყრობის, პირადი ცხოვრების ამსახველი ინფორმაციის უკანონო მოპოვება-შენახვა-გავრცელების ფაქტებზე.

  • სრულწლოვან ბრალდებულს — 6 წლით, ხოლო არასრულწლოვან პირს — 4 წლითა და 6 თვით პატიმრობა მიესაჯა.

უწყების ცნობით, გურჯაანის რაიონულმა სასამართლომ ბრალდებულები ჯგუფურად ძალადობით ჩადენილი ძარცვისა და ჯგუფურად გამოძალვის ფაქტებზე გაამართლა, რასაც პროკურატურა სააპელაციო წესით გაასაჩივრებს.