ამის შესახებ ფრაქცია ქართული ოცნების თავმჯდომარემ დღეს, 14 ნოემბერს გამართულ ბრიფინგზე ისაუბრა.

რატომ არის მნიშვნელოვანი: ევროკავშირის მიერ გაცემულ 12 რეკომენდაციაში, ერთ-ერთი სახალხო დამცველის გამჭვირვალედ და დემოკრატიულად არჩევას უკავშირდება.

  • მოქმედ სახალხო დამცველს, ნინო ლომჯარიას უფლებამოსილების ვადა 2022 წლის 8 დეკემბერს ეწურება;
  • უკვე დასრულდა სახალხო დამცველობის კანდიდატების გასაუბრება პარლამენტში.
  • ახალი სახალხო დამცველის ასარჩევად პარლამენტს 90 ხმა სჭირდება, ცალკეულ პარტიას დამოუკიდებლად კი ამდენი ხმა არ აქვს.

დეტალები: მდინარაძის განცხადებით, არც ერთი ოპონენტი არ შეხმიანებიათ და კონსულტაციების სურვილი არ გამოუთქვამთ.

  • მისი თქმით, დიდი ხანია ელოდებიან, ამიტომ თავად გამოდის ინიციატივით, ხვალ დაიწყოს კონსულტაციები.
  • "თუკი ვინმეს თეორიული შანსი აქვს იმიტომ, რომ ჩვენ არ გვინდა, 1%-ც კი დავუშვათ, თუ ძალით არ ქნა ვიღაცამ, რომ ჩავარდეს რომელიმე პუნქტი ამის გამო. თუკი თეორიულად შესაძლებელია შეთანხმება რომელიმე კანდიდატზე ჩვენ შევეცდებით, რომ ეს შანსი პრაქტიკულად ვაქციოთ", — ამბობს მდინარაძე.

გარდა ამისა, მდინარაძემ თქვა ისიც, რომ ქართული ოცნება არც ერთ კანდიდატს არ უცხადებს მხარდაჭერას საჯაროდ. აღნიშნა, რომ ამაზე არ საუბრობენ არც უმრავლესობის სხდომებზე.

  • დეპუტატის თქმით, კომიტეტის თავმჯდომარემ, მიხეილ სარჯველაძემ უმრავლესობის სხდომაზე განაცხადა, რომ კომიტეტი მხოლოდ ფორმალურ მხარეზე იმსჯელებს და ამის მიხედვით დაუჭერს მხარს იმ კანდიდატს, ვინც ფორმალურ ნაწილს დააკმაყოფილებს მოთხოვნებს და "შინაარსში არც ერთ საკითხთან დაკავშირებით არ შევა".