პრეზენტაცია გუშინ გაიმართა და "კონსერვატიული პორტალი" სატესტო რეჟიმში ჩაეშვა.

რატომ არის მნიშვნელოვანი: ანტიდასავლური და ჰომოფობიური მიდგომებით ცნობილმა ვატო შაქარიშვილმა თანამოაზრეებთან ერთად ახალი პორტალი შექმნა, რომელსაც "ლიბერალების დიქტატის" წინააღმდეგ მიმართულ ანალიტიკურ გამოცემად წარმოაჩენს, თუმცა რეალობა გვაჩვენებს, რომ მათი თავდასხმის სამიზნე დასავლური ღირებულებებია.

• მაშინ, როცა საქართველო რუსული საინფორმაციო ომისა და პროპაგანდის მსხვერპლია, ამ პორტალის დამფუძნებლები ისრების გადატანას ცდილობენ და მთავარ მტრად არა კრემლს, არამედ ნეოლიბერალიზმს ასახელებენ.
• ამაში დასარწმუნებლად პორტალის ნახვა და დამფუძნებლების კომენტარების მოსმენა სრულიად საკმარისია.
• საგულისხმოა პორტალის პრეზენტაციაზე მყოფი სტუმრები და სიტყვით გამომსვლელები — გია გაჩეჩილაძე, გოგა ხაინდრავა, ანტიდასავლური მოძრაობა ხალხის ძალის წევრები, დეპუტატი ფრიდონ ინჯია და სხვები.

რა ვიცით: პორტალს "საქართველო უპირველეს ყოვლისა ქვია" და როგორც ფეისბუქგვერდიდან გვამცნობენ, გაშუქდება "არამეინსტრიმული ამბები, რომელსაც ლიბერალური მედია კრძალავს".

• ერთ-ერთმა დამფუძნებელმა, ირმა სანაძემ POSTV-ის განუცხადა, რომ "სექტანტებმა დაირქვეს ლიბერალები" და ყველაფერ ანტილიბერალურს, ლიბერალურად ასახელებენ — მისი თქმით, ამიტომ აკეთებენ პორტალს, რომ საზოგადოებამდე ალტერნატიული ინფორმაციები მიიტანონ.
• შეგახსენებთ, რომ თავის დროზე მსგავსი არგუმენტები ჰქონდათ ალტ-ინფოს შემქმნელებსაც, რომლებსაც ახლა ღიად პრორუსულ, ძალადობრივ პარტიად ვიცნობთ.
• ამ პორტალის წარდგენის ღონისძიებას ესწრებოდა აი იას კიდევ ერთი დამფუძნებელი, უცნობი, რომელმაც POSTV-ის უთხრა, რომ ყველაზე მნიშვნელოვანია, ხალხმა სიმართლე გაიგოს: "ჩვენ როდესაც ოპოზიციაში ვიყავით მაშინაც იყო ეს ლოზუნგი — საქართველო უპირველეს ყოვლისა. ესეც უნდა იყოს, ჯერ საკუთარი ქვეყანა უნდა იყოს პირველ რიგში და მერე ყველა დანარჩენი".
• გარდა ამისა, პრეზენტაციაზე იყო ქართული ოცნებიდან წამოსულების შექმნილი მოძრაობის, ხალხის ძალის წევრიც — დავით ქართველიშვილის თქმით, "პორტალი შეავსებს დეფიციტს და მიაწვდის მოსახლეობას და საზოგადოებას სწორ ინფორმაციას ქართულ ფესვებთან დაკავშირებულს, მსოფლიოში მიმდინარე ძალიან მნიშვნელოვან მოვლენებზე".

პორტალზე მთავარ ამბად გამოტანილია კონგრესმენის ციტატა უკრაინაზე, რომელსაც არც შესავალი აქვს, არც ბოლო და არც წყარო ახლავს. მსგავსი სიტუაციაა სხვა მასალებზეც.

• მენიუს დათვალიერებისას კი აღმოაჩენთ, რომ რეზიდენტ ავტორებში მხოლოდ ვატო შაქარიშვილის ფოტოა დამატებული და ზურა სხილაძე აწერია.

დეტალები: უცნობის კიდობანში პორტალის წარდგენისას ვატო შაქარიშვილმა არაერთი რუსული ნარატიი გაავრცელა — აშშ-ისა და ევროპის "პრობლემები და კრიზისები" მიმოიხილა, საბჭოთა ნოსტალგია გააღვივა და ჰომოფობიური მოტივით ამერიკის "ერთი მხარეც" დაიწუნა.

• "საჭიროება გამოიკვეთა რუსეთ-უკრაინის ომის დაწყების შემდეგ. როდესაც ცხელი ომის პარალელურად წარმოებს უდიდესი, უმსხვილესი, უძლიერესი საინფორმაციო პროპაგანდისტული ომი. როგორც ცხელ ომს, ასევე პროპაგანდისტულ ომსაც ჰყავს თავისი მსხვერპლები. იმისთვის, რომ ადამიანმა გააკეთოს სწორი ანალიზი, მას სჭირდება შესაბამისი რეალისტური ნამდვილი ამბავი და არა ნეოლიბერალების მიერ გაფერადებული", — განაცხადა მან.
• "იმ ეპოქაში, რომელსაც მე არ მოვსწრებივარ, მაგრამ შენ კარგად გახსოვს, საბჭოთა დროს ვგულისხმობ, მაშინ უფრო ხელმისაწვდომი იყო ამბები დასავლეთიდან ე.წ. რკინის ფარდის მიღმა სივრციდან, ვიდრე დღეს", — ეს ფრაზაც შაქარაშვილს ეკუთვნის და იმავე ეთერში გააჟღერა.