2017 წლის მაისი-ივნისში საქართველოს ლატარიის კომპანიამ და ქალთა საინფორმაციო ცენტრმა, სოციალურად დაუცველი მრავალშვილიანი ქალების დასახმარებლად, კამპანიის მეორე ეტაპი დაიწყო.

1-თვიანი სოციალური კამპანიის სახელწოდებაა „ასე უფრო მარტივია“ და მისი მიზანია სოფლად მცხოვრები სოციალურად დაუცველი, მრვალშვილიანი და მძიმე პირობებში მცხოვრები ოჯახების დახმარება საყოფაცხოვრებო ტექნიკითა და პროდუქტებით.

კამპანიის ფარგლებში წინასწარ შეირჩა ბენეფიციარები და განისაზღვრა თითოეული მათგანის საჭიროება.

"საქართველოში არსებული მძიმე ეკონომიური და სოციალური პირობებიდან გამომდინარე, ბევრი ოჯახი ჯერ კიდევ რთულ, ყოფით პირობებში ცხოვრობს. განსაკუთრებით სოფლად, სისუფთავის და ჰიგიენის დასაცავად ქალებს დიდი შრომა უწევთ, რაც მძიმედ აისახება მათ ჯანმრთელობაზე" - აცხადებს ქალთა საინფორმაციო ცენტრი.

კამპანია ამ ეტაპზე მოიცავს 4 რეგიონს და 12 მრავალშვილიან ოჯახს, რომლებიც ერთი თვის განმავლობაში საქართველოს ლატარიის კომპანიისა და ქალთა საინფორმაციო ცენტრისგან სასაჩუქრე გზავნილებს მიიღებენ.

“ვიცით რომ ამ პროექტს არა ერთი ოჯახი მოუთმენლად ელის. არასამთავრობო სექტორთან თანამშრომლობის გამოცდილებამ გვაჩვენა, რომ კერძო და არასამთავრობო სექტორის ძალების ერთიანობით სოციალური პროექტები უფრო მეტად წარმატებული და შედეგიანია” - აცხადებს საქართველოს ლატარიის კომპანიის საზოგადოებასთან ურთიერთობისა და კომუნიკაციის სამსახურის უფროსი ანა იასეშვილი და დასძენს, რომ კამპანიაში ჩართულია ყველა ის პირი, რომელიც ლოტო 6/36-ის თუნდაც ერთ ბილეთს ყიდულობს.

ქალთა საინფორმაციო ცენტრის ხელმძღვანელის ელენე, რუსეცკაიას თქმით ტექნიკა შრომას გაუმარტივებს პირველ რიგში ქალებს:

“მათ გამოუნთავისუფლდებათ დრო პირადი სივრცისათვის რომლის გამოყენებაც შეეძლებათ ფორმალური თუ არაფორმალური განათლებისათვის, საზოგადოებრივ ცხოვრებაში გააქტიურებისთვის, შვილებთან და ოჯახის წევრებთან მეტი ურთიერთობისათვის. ცხოვრება ასე უფრო მარტივია. ჩვენი ორგანიზაცია იცნობს ასეთ ოჯახებს, ვმუშაობთ მათთან და ვთვლით რომ ბიზნესთან თნამშრომლობა მეტ შედეგს მოიტანს“.

კამპანიის პირველი ეტაპი 2016 წელის დეკემბერში წარმატებით განხორციელდა, ამჯერად ბენეფიციარების რაოდენობა და დაფარვის არეალი გაიზარდა. პროექტი საქართველოს ლატარიის კომპანიის სრული დაფინანსებით ხორციელდება.