კვლევის შედეგები ამერიკის რესპუბლიკურმა ინსტიტუტმა დღეს, 7 ნოემბერს გამოაქვეყნა.

რატომ არის მნიშვნელოვანი: ევროატლანტიკურ სტრუქტურებში ინტეგრაცია ქვეყნის დეკლარირებული კურსია და ყოველწლიურად, ყველა გამოკითხვაში EU-სა და NATO-ში გაწევრიანებას მოსახლეობის უმრავლესობა უჭერს მხარს.

დეტალები: IRI-ის ახალი გამოკითხვის თანახმად, 70% ევროკავშირში გაწევრიანებას მხარს მტკიცედ უჭერს, 64% კი ნატოში გაწევრიანების მტკიცე მხარდამჭერია.

  • ნატოში გაწევრიანებას კატეგორიულად ეწინააღმდეგება 12%, ევროკავშირში გაწევრიანების კატეგორიული წინააღმდეგი კი 7%-ია.
  • საქართველოს ყველაზე მნიშვნელოვან პოლიტიკურ პარტნიორად გამოკითხულთა 51% — ევროკავშირს, 47% — აშშ-ს, 24% კი უკრაინას მიიჩნევს.
  • ევროკავშირს მიიჩნევს ყველაზე მნიშვნელოვან ეკონომიკურ პარტნიორად კვლევაში მონაწილეთა 48%, მეორე ადგილს კი 43%-ით აშშ იკავებს, მას მოჰყვება თურქეთი 28%-ით.

ყველაზე დიდ პოლიტიკურ საფრთხედ გამოკითხულთა 89% რუსეთს ასახელებს, 11% — თურქეთს, 6% — აშშ-ს.

  • ასევე, რუსეთი ყველაზე დიდი ეკონომიკური საფრთხეა კვლევის მონაწილეთა 80%-ის აზრით.
  • რუსეთთან დიალოგს მხარს მხოლოდ 34% უჭერს, 30% კი კატეგორიულად ეწინააღმდეგება.
  • შეკითხვაზე, როგორ აფასებთ დღევანდელი ხელისუფლების ურთიერთობას რუსეთთან, 29% ამბობს, რომ ძალიან ნეგატიურად, 12% კი ძალიან პოზიტიურად.
  • საქართველოს რუსეთთან ურთიერთობის ამჟამინდელი მდგომარეობის გათვალისწინებით, გამოკითხულთა უმრავლესობა — 37% თავს დაუცველად გრძნობს, 13% კი ამბობს, რომ უსაფრთხოდაა.

მეთოდოლოგია: კვლევა ჩატარდა 2022 წლის 13 სექტემბერი — 2 ოქტომბრის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ.

  • კვლევის საველე სამუშაოები ჩატარდა IPM-ის მიერ. მონაცემები შეგროვდა პირისპირ ინტერვიუს გზით.
  • შერჩევა მოიცავდა საარჩევნო ხმის უფლებისა და ასაკის მქონე 1500 რესპონდენტს.
  • მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად.
  • ცდომილების ზღვარი წარმოადგენს +/- 2.5 %, გამოპასუხების მაჩვენებელი — 74 %.
  • კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.