ამის შესახებ უკრაინის პრეზიდენტმა, ვოლოდიმირ ზელენსკიმ ჩეხურ მედიასთან ინტერვიუში ისაუბრა.

რატომ არის მნიშვნელოვანი: 2022 წლის 24 თებერვალს რუსეთი უკრაინის ტერიტორიაზე შეიჭრა და ომი დაიწყო, თუმცა ამას "სპეციალურ სამხედრო ოპერაციას" უწოდებდნენ.

  • 2022 წლამდე იყო 2014 წელი — მაშინ რუსეთმა ყირიმის ნახევარკუნძულის ოკუპაცია მოახდინა და ანექსირებულ ტერიტორიად გამოაცხადა.
  • სრულმასშტაბიანი ომის დაწყებიდან 7 თვის შემდეგ კი პუტინმა კიდევ 4 რეგიონის ანექსია გამოაცხადა, თუმცა ისინი ბოლომდე ოკუპირებულიც არ აქვს.
  • უკრაინის ოფიციალური პირები და თავად პრეზიდენტი აცხადებს, რომ მოლაპარაკებებზე საუბარი შესაძლებელი იქნება მხოლოდ მაშინ, თუ რუსეთი უკრაინის მთელ ტერიტორიას დატოვებს.

დეტალები: კითხვაზე უბიძგებს თუ არა ვინმე უკრაინის პრეზიდენტს რუსეთთან კომპრომისებისკენ, ვოლოდიმირ ზელენსკიმ ასე უპასუხა: "ვფიქრობ, ქვეყნების ზოგიერთი ლიდერი, რა თქმა უნდა, ისურვებდა".

  • "არ მინდა ახლა ამაზე ჩემი შეფასება მივცე, რადგან ამას არ აქვს მნიშვნელობა", — აღნიშნა მან.
  • "ჩვენ იქ [რუსეთთან მოლაპარაკებებზე] უკვე ვიყავით. ჩვენთვის იქ ახალი არაფერია, არანაირი სიურპრიზი. მე უკვე ვიცი, რით დასრულდება ეს ისტორია. ამიტომ, არ მსურს ველოდო დასასრულს, რადგან ეს არ იქნება "ბედნიერი დასასრული" ამ ქვეყანასთან, ამ "მეზობელთან".
  • ამბობს, რომ რუსეთთან ძალიან პრაგმატული ურთიერთობა უნდა ააწყონ.

ზელენსკის განცხადებით, დამოუკიდებლობის 31 წლის განმავლობაში უკრაინამ ვერ შეძლო უსაფრთხოების ძლიერი სისტემის აშენება.

  • აღნიშნა, რომ უკრაინა არ ელოდა რუსეთისგან ასეთ სისასტიკეს, სისხლისღვრას და აგრესიულობას და ეს, პრეზიდენტის თქმით, უკრაინელი პოლიტიკოსების ყველაზე დიდი შეცდომაა.