ვიდეო, სადაც შრომის მასწავლებელი თავისი გამოგონების ისტორიას ჰყვება, უკრაინულმა მედიამ გაავრცელა.

რატომ არის მნიშვნელოვანი: უკრაინელი მასწავლებლის შექმნილი დასაკეცი ღუმელი სამხედროებს, განსაკუთრებით, ზამთრის ბრძოლებში გამოადგებათ.

  • უკრაინელი მებრძოლები საკვებისა და ჩაის მომზადებას რამდენიმე წუთში, მხოლოდ გირჩებისა და წიწვების დახმარებით შეძლებენ.
  • გამოგონება კიდევ უფრო საჭირო მას შემდეგ გახდა, რაც რუსული სარაკეტო თავდასხმების შედეგად უკრაინაში მნიშვნელოვნად დაზიანდა ენერგო ობიექტები და მოსახლეობას ელექტროენერგია გრაფიკით მიეწოდება.

დეტალები: სერგეი მარუშჩენკოს დასაკეცი ღუმელების შექმნის იდეა მას შემდეგ გაუჩნდა, რაც მსგავსი მოწყობილობა ერთ-ერთ ვიდეოში, ამერიკელ სამხედროებთან ნახა.

  • მასწავლებლის თქმით, ღუმელის დამზადება საკმაოდ მარტივია და ამას უკვე მისი მოსწავლეებიც მშვენივრად ახერხებენ.
  • "როგორც პრაქტიკამ აჩვენა, ფიჭვის გირჩები საუკეთესოა. 5-6 მშრალი გირჩი საკმარისია, რომ ჭიქა წყალი 3 წუთში ადუღდეს", — ამბობს მარუშჩენკო.
  • უკრაინელი მასწავლებელი ფრონტის ხაზზე რამდენიმე ათეულ მინიატურულ ღუმელს უახლოეს მომავალში გაგზავნის.