ჯერ კიდევ უცნობია, როდის შეძლებენ მოქალაქეები მეტროსადგურ გოცირიძით სარგებლობას.

რატომ არის მნიშვნელოვანი: სარემონტო-სარეკონსტრუქციო სამუშაოების გამო მეტროსადგური 2021 წლის თებერვალში დაიკეტა. მერიაში ამბობდნენ, რომ მეტრო მგზავრებს 3 თვე ვერ მოემსახურებოდა.

  • 2021 წლის დეკემბერში კი კალაძემ თქვა, რომ რეაბილიტაცია 7 თვეში დასრულდებოდა. 2022 წლის თებერვალში მერიაში აცხადებდნენ, რომ მეტრო მგზავრებს მაისიდან მოემსახურებოდა.
  • უკვე 9 მაისს მერიაში თქვეს, რომ მეტროსადგურის გახსნა, შესაძლოა, კიდევ ერთი თვით გადადებულიყო, თუმცა ზუსტ თარიღს ვერ აკონკრეტებდნენ.
  • 3 აგვისტოს კი თბილისის მერმა აღნიშნა, რომ უკვე ეშინია, თქვას დრო, თუ როდის დამთავრდება.

დეტალები: კალაძის განცხადებით, მიმდინარეობს მეტროსადგურ გოცირიძის ექსპლუატაციაში მიღების პროცედურა.

  • კითხვაზე, როდის მიიღებს სადგური მგზავრებს, კალაძემ თქვა, რომ მაშინვე, როგორც კი პროცედურები დასრულდება, თუმცა დრო კვლავ არ დაუკონკრეტებია.

არქივიდან: სადგურის დაზიანების შესახებ დასკვნა 4 წელზე მეტია არსებობს. ექსპერტიზის დასკვნით, მეტროსადგურს არაერთი დაზიანება ჰქონდა.

  • თუმცა, სატრანსპორტო კომპანიაში 2019 წელს აცხადებდნენ, რომ მეტროთი მგზავრობა "იმდენად უსაფრთხოა", რომ გამაგრებით სამუშაოებს არ გეგმავდნენ.
  • სარემონტო-სარეკონსტრუქციო სამუშაოების დაწყების შემდეგ მერიამ ტენდერი არაერთხელ გამოაცხადა — მათგან რამდენიმე არ შედგა, რადგან მონაწილეობა არავინ მიიღო.
  • ერთ შემთხვევაში კი მონაწილე კომპანიას დისკვალიფიკაცია მიენიჭა. პროექტის ბიუჯეტი 4 700 000 ლარია.