4-დან 6 ნოემბრის ჩათვლით ექსპო ჯორჯიაში თბილისის წიგნის დღეები გაიმართება, რაც მკითხველებისთვის ზამთრის საკითხავის მოსამარაგებლად საუკეთესო შესაძლებლობაა. ტრადიციულად, სულაკაურის გამომცემლობა მკითხველს არაერთ სიახლეს, საინტერესო აქტივობასა და ფასდაკლებას დაახვედრებს.

სტატიაში წარმოგიდგენთ წიგნებს, რომლებიც თბილისის წიგნის დღეებზე აუცილებლად მიიპყრობს თქვენს ყურადღებას.

1. კობო აბე — სხვისი სახე

მთარგმნელი: ირაკლი ბერიაშვილი

ლიტოდისეა გრძელდება! ამჯერად სერიას ცნობილი იაპონელი მწერლის, კობო აბეს რომანი — სხვისი სახე დაემატება.შეუძლია ადამიანს სახის გარეშე არსებობა? შეიცავს სახე რაღაც შეუცვლელს და იმდენად ფასეულს, რომ უმისოდ ადამიანი საკუთარ თავსაც კარგავს? ეს ერთადერთი კითხვა არ არის, რომელსაც კობო აბე მკითხველის და ალბათ საკუთარი თავის წინაშეც სვამს რომანში სხვისი სახე.

2. ფრანსუა ვიიონი — მცირე ანდერძი, დიდი ანდერძი

მთარგმნელი: დავით წერედიანი

მკითხველებისთვის ერთ-ერთ გამორჩეულ სერიას — მსოფლიო კლასიკას თბილისის წიგნის დღეებზე ორი ახალი დასახელება დაემატება. ფრანსუა ვიიონი xv საუკუნის ფრანგი პოეტია, რომლის შემოქმედებამაც ჩვენამდე მისი ხელნაწერებისა და გამოცემული წიგნების ფრანგმენტების წყალობით მოაღწია. დავით წერედიანის მიერ თარგმნილი ლექსები პოეტური თარგმანის შედევრად მიიჩნევა. წიგნში — მცირე ანდერძი, დიდი ანდერძი ფრანსუა ვიიონის ლექსები თითქმის სრულად იქნება წარმოდგენილი.

3. ფიოდორ დოსტოევსკი — იდიოტი

მთარგმნელი: გივი კიკილაშვილი

მსოფლიო კლასიკას შეემატება ფიოდორ დოსტოევსკის კიდევ ერთი მნიშვნელოვანი რომანი, იდიოტი, რომელიც ქართულად გივი კიკილაშვილმა თარგმნა. მშვიდი ცხოვრება თუ სხვისი სულის გადარჩენის მძიმე პასუხისმგებლობა? – სწორედ ეს დილემა გამოკვეთს ყველაზე მკაფიოდ ფიოდორ დოსტოევსკის უმთავრეს ფილოსოფიურ საზრუნავს: რა არის ადამიანი?

4. გოგი გვახარია — ცრემლიანი სათვალე

თბილისის წიგნის დღეებზე მკითხველებს ცრემლიანი სათვალის განახლებული ტირაჟი დახვდებათ.

5. მიშიკო სულაკაური — თბილისი კომენტარით

ქუჩაში რასაც ვხედავთ დღეს, ხვალ შეიძლება ვეღარ ვნახოთ — სწორედ ასე იწყება მიშიკო სულაკაურის თბილისი კომენტარით, რომლის მთავარი გმირიც თბილისია. წიგნში თავმოყრილია თბილისის იერსახის მრავალშრიანი არქივი/ლექსიკონი, რომელიც აღწერს მოსახლეობების კომენტარებსა თუ მანიფესტაციებს ქუჩაში. ამ მხრივ თბილისი ერთგვარ ლიტერატურულ ძეგლსაც შეიძლება შევადაროთ, რადგან ის ინახავს ენას რომელიც კონკრეტულმა დრომ შექმნა.

6. ესქილე — ტრაგედიები

მთარგმნელი: ლევან ბერძენიშვილი

ესქილე ელევსისში, არისტოკრატიულ ოჯახში დაიბადა და ელევსისის მისტერიებმა მასზე დიდი გავლენა მოახდინა. ის ათენის სცენის ნამდვილი მეფე იყო, ათენელი მაყურებელი ესქილეს, უბრალოდ, აღმერთებდა. ის ერთადერთი ავტორი იყო, რომლის პიესები მისი სიკვდილის შემდეგაც იდგმებოდა. ტრაგედიები ლევან ბერძენიშვილმა თარგმნა.

5 ნოემბერს, 14:30 საათზე ექსპო ჯორჯიაში წიგნს ლევან ბერძენიშვილი და დავით პაიჭაძე წარადგენენ.

7. სალი რუნი — მშვენიერო სამყაროვ, სად ხარ

მთარგმნელი: გურამ ღონღაძე

სალი რუნის ქართველი მკითხველი უკვე კარგად იცნობს. ახლახან ქართულ ენაზე გამოიცა ავტორის მესამე რომანი — მშვენიერო სამყაროვ სად ხარ. რომანის მთავარი გმირები ცდილობენ, მოერგონ ამ სამყაროს, იპოვონ საკუთარი თავი. ესაა სიყვარულის, ვნების, სურვილების, ტკივილისა და შიშის დაუსრულებელი ციკლი. იპოვიან კი ეს პერსონაჟები ადამიანებს, რომლებიც მათ ცხოვრებას უკეთესს გახდიან და დაანახვებენ მშვენიერი სამყაროსკენ მიმავალ გზას?

8. ლიტოდისეა — განახლებული გამოცემები

ლიტოდისეა მკითხველებს არა მხოლოდ სიახლეებით, არამედ ბესტსელერი წიგნების განახლებული გამოცემებითაც დახვდება. მათ შორისაა მისტერიები, გახლეჩილი აპრილი, კაენი და კრავთა დუმილი და სხვა.

შეგახსენებთ, რომ 4-დან 6 ნოემბრის ჩათვლით თბილისის წიგნის დღეები ექსპო ჯორჯიაში გაიმართება და სტატიაში მოცემული თითოეული წიგნის შეძენას სულაკაურის გამომცემლობის სტენდთან შეძლებთ.