ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

რატომ არის მნიშვნელოვანი: უკრაინის პრეზიდენტის განცხადებით, კახოვკას ჰიდროელექტროსადგური უკრაინაში ენერგიის ერთ-ერთი უმსხვილესი დაწესებულებაა და მისი კაშხალი 18 000 000 კუბურ მეტრ წყალს შეიცავს.

  • მისი აფეთქების შემთხვევაში 80-ზე მეტი დასახლება დატბორვის ზონაში აღმოჩნდება და ასობით ათასი ადამიანი შესაძლოა დაზარალდეს.
  • კახოვკის ჰესი ხერსონის ოლქის ქალაქ ნოვა კახოვკადან 5 კილომეტრში მდებარეობს.

დეტალები: ომის კვლევის ინსტიტუტის დღევანდელ ანგარიშში ნათქვამია, რომ ბოლო დღეებში რუსები აქტიურად ამზადებენ საინფორმაციო სივრცეს პროვოკაციისთვის, ე.წ. False Flag ოპერაციისთვის, კახოვკას ჰიდროელექტროსადგურზე, რათა ამით საკუთარი უკან დახევა და მნიშვნელოვანი ტერიტორიის "დაკარგვა" გაამართლონ.

  • Unian-მა ტელეგრამზე გამოაქვეყნა ვიდეო, რა შეიძლება გამოიწვიოს ჰესის აფეთქებამ.

ზელენსკი აცხადებს, რომ რუსმა სამხედროებმა კახოვსკას ჰესის აგრეგატები და კაშხალი დანაღმეს.

  • მისი თქმით, კაშხლის აფეთქების შემთხვევაში, ზაპოროჟიეს ატომური ელექტროსადგურის გამაგრილებელი სისტემა წყლის გარეშე დარჩება.
  • ზელენსკი ითხოვს ადგილზე საერთაშორისო სადამკვირვებლო მისიის გაგზავნა, იქ უკრაინელი პერსონალის დაბრუნებასა და აგრეგატებისა და კაშხლების დაუყოვნებელი განაღმვის უზრუნველყოფას.
  • თქვა, რომ რუსეთმა უკვე მოამზადა ყველაფერი ამ ტერაქტის განსახორციელებლად.

გარდა ამისა, ზელენსკიმ თქვა, რომ ახლა მსოფლიოში ყველამ უნდა იმოქმედოს ძლიერად და სწრაფად, რათა თავიდან აიცილოს ახალი რუსული ტერორისტული თავდასხმა.

  • მისი შეფასებით, ჰესის კაშხლის განადგურების შემთხვევაში ჩრდილოეთ ყირიმის არხი უბრალოდ გაქრება.
  • "თუ რუსეთი ამზადებს ასეთ ტერაქტს, თუ სერიოზულად განიხილავს ასეთ სცენარს, ეს ნიშნავს, რომ ტერორისტებმა აშკარად იციან, რომ ვერ შეძლებენ შეინარჩუნონ არა მხოლოდ ხერსონი, არამედ მთელი ჩვენი ქვეყნის სამხრეთი, ყირიმის ჩათვლით".
  • "მსოფლიომ უნდა მოახდინოს რეაგირება — პრევენციულად. ეს არის ახლა მთავარი", — აცხადებს ზელენსკი.