საქართველოს პრემიერ-მინისტრი, გიორგი კვირიკაშვილი ამბობს, რომ მშვიდობიანი და თანამიმდევრული პოლიტიკაა ის იარაღი, რომელიც გააერთიანებს საქართველოს და "დაგვიბრუნებს აფხაზ და ოს ძმებს". ამის შესახებ პრემიერ-მინისტრმა დღეს, 26 მაისს სიტყვით გამოსვლის დროს განაცხადა.

"დღეს ქვეყანას ჩვენგან თავდადება ისევ სჭირდება, რათა შევინარჩუნოთ, კიდევ უფრო განვამტკიცოთ და გავაძლიეროთ ჩვენი მრავალეროვანი ქართული სახელმწიფო," - თქვა კვირიკაშვილმა.

კვირიკაშვილის გამოსვლის ძირითადი ნაწილი ქართველ სამხედროებს შეეხო. მან წვევამდელებს, რომლებმაც დღეს ფიცი დადეს დამოკიდებლობის დღე მიულოცა.

"არ არსებობს იმაზე მეტი პატივი, ვიდრე სამშობლოს სადარაჯოზე დგომაა. გილოცავთ ყველას ფიცის დადებას და ჯარისკაცის საპატიო მისიის დაწყებას! მე მჯერა, რომ თქვენ პირნათლად ემსახურებით საქართველოს და ღირსეულად ატარებთ ქართველი მეომრის სახელს," - მიმართა წვევამდელებს კვირიკაშვილმა.

მისი თქმით, წელს საქართველოს დამოუკიდებლობის დღე გამორჩეულია, რადგან დღევანდელი დღე შოთა რუსთაველს და ვეფხისტყაოსანს ეძღვნება.

"ჩვენ მსოფლიოს უდიდესი საგანძურის პატრონი ერი ვართ და, როგორც რუსთაველის შთამომავლები, ვალდებული ვართ, ვუერთგულოთ და ვიცხოვროთ იმ ღირებულებებით, რომელიც 850 წელს ითვლის," - თქვა მან.

დღეს საქართველოში თავისუფლების დღე აღინიშნება. დღევანდელი ღონისძიებისთვის მთავრობა 1,6 მილიონზე მეტი იხარჯება. თბილისში, 26 მაისის დაგეგმილი ღონისძიებების განრიგი დეტალურად იხილეთ აქ.