უკრაინული მედიის ინფორმაციით, რუსეთი აგრძელებს უკრაინაზე საჰაერო თავდასხმებს და უტევს ქვეყნის ენერგეტიკულ სისტემას.

რატო არის მნიშვნელოვანი: უკვე რამდენიმე კვირაა, რაც უკრაინაზე მასიური სარაკეტო თავდასხმა მიმდინარეობს.

  • რუსეთი უკრაინულ დასახლებებს ირანული კამიკაძე დრონებით ბომბავს.
  • მხოლოდ გუშინ კიევზე საჰაერო თავდასხმას, ბოლო მონაცემებით, 4 ადამიანი ემსხვერპლა, მათ შორის — 6 თვის ორსული და მისი ქმარი.

დეტალები: 18 ოქტომბერს, დილით რუსი სამხედროები კვლავ თავს დაესხნენ უკრაინის ენერგეტიკულ ინფრასტრუქტურას. აფეთქებებია დნეპრში, ხარკოვში, ზაპოროჟიესა და ჟიტომირში.

  • ზოგიერთი ქალაქი ელექტროენერგიის გარეშეა დარჩენილი.
  • "კიევში დილით ისევ აფეთქებებია. დესნიანსკის რაიონი. კრიტიკული ინფრასტრუქტურის ობიექტი. ყველა სამსახური ადგილზეა. დამატებითი დეტალები მოგვიანებით", — წერს ქალაქის მერი, ვიტალი კლიჩკო.

ზაპოროჟიე: ქალაქს ოკუპანტები გასული ღამის განმავლობაში თავს ესხმოდნენ "შაჰედებითა" და სარაკეტო სისტემებით.

  • ზაპოროჟიეს საოლქო-სამხედრო ადმინისტრაციის ხელმძღვანელის, ალექსანდრ სტარუხის ინფორმაციით, თავდასხმის შედეგად ხანძარი გაჩნდა ინფრასტრუქტურულ ობიექტზე, 1 რაკეტა კი ქალაქში მდებარე საწყობს დაეცა.
  • სტარუხის ინფორმაციით, შემთხვევას მსხვერპლი არ მოჰყოლია.

ნიკოლაევი: ოკუპანტები თავს საცხოვრებელ სახლს დაესხნენ.

  • უკრაინული მედიის ცნობით, ორსართულიანი სახლის ნანგრევებში მაშველებმა კაცის ცხედარი იპოვეს. სამაშველო ოპერაცია გრძელდება.
  • დაბომბვის შედეგად განადგურდა ყვავილების ბაზრობაც, თუმცა შემთხვევას მსხვერპლი არ მოჰყოლია.
  • ნიკოლაევის ოლქის ხელმძღვანელის, ვიტალი კიმის ინფორმაციით, ქალაქში დილიდან აღდგენილია ელექტრომომარაგება.

დნეპრი: აფეთქებებმა ქალაქში კრიტიკული ინფრასტრუქტურის ობიექტები გაანადგურა.

  • როგორც უკრაინსკა პრავდა იუწყება, რეგიონში გრძელდება საჰაერო თავდასხმები.
  • ზოგიერთ რაიონში მოსახლეობას ელექტროენერგიისა და წყლის მიწოდება შეუწყდა.

ჟიტომირი: წყალი და ელექტროენერგია არ მიეწოდება ჟიტომირის მცხოვრებლებსაც.

  • ქალაქი 18 ოქტომბრის დილას დაიბომბა, რის გამოც საავადმყოფოები ამ დრომდე სარეზერვო ენერგიაზე მუშაობენ.
  • პრეზიდენტის აპარატის უფროსის მოადგილის, კირილ ტიმოშენკოს ინფორმაციით, ენერგომომარაგების ობიექტებზე 2 დარტყმა განხორციელდა. ადგილზე მუშაობს საგანგებო სიტუაციების სახელმწიფო სამსახური.

ხარკოვი: 18 ოქტომბრის დილას ოკუპანტებმა ისევ დაბომბეს ხარკოვი.

  • წინასწარი ინფორმაციით, თავდასხმა ერთ-ერთი სამრეწველო საწარმოს ტერიტორიაზე მოხდა.
  • დაბომბვის გამო მეტროს ხაზებზე მატარებლის მოძრაობა დროებით შეჩერებულია.